जू विरुद्ध अभियान

येँ – मोहनिया इलय् जू म्हितीपिंत ज्वनेगु लागिं थुगुसी प्रहरीं फोर्स परिचालन याइगु जूगु दु । म्हीग येँया कागेश्वरीइ जू म्हिताच्वंथाय् छापा मारे याःबलय् निम्ह मनू सीगु घटना लिपा प्रहरीं आः देय्न्यंकं हे जू म्हितीपिंत ज्वनेगु तीव्र अभियान हे न्ह्याकेगु खँ धाःगु दु । उकिया लागिं जक निद्वः प्रहरी परिचालन यायेत्यंगु खँ नं सीदुगु दु ।

जू म्हितीपिंत ज्वनेगु अभियान सफल यायेगु लागिं गन गन जू म्हितीगु खः अनया बारे जानकारी बीत प्रहरीं जःलाखःलापिंत इनाप याःगु दु । छेँ दुने हे न्ह्यइपुकेत थःथः जानाः म्हितीपिंत धाःसा छुं मयाइगु खँ नं प्रहरीं स्पष्ट याःगु दु ।

थ्वहे झ्वलय् समाजशास्त्रया विज्ञतय्सं जू म्हितीपिंत ज्वनेगु जक मयासे मोहनि स्वन्ति थेंज्याःगु नखःचखःबलय् जू म्हिते मजिउ धइगु चेतना थनेगु अभियान नं न्ह्याकेमाःगु खँ धयाहःगु दु ।