ने. सं. ११४३ तछलाथ्व दशमी -

कृतिम कुमारीत्व

थ्व कृतिम धइगु नं तसकं अजू चायापु । न्ह्याथाय् स्वःसां कृतिम अर्थात नक्कलि । कृतिम अभाव, कृति वसः, कृतिम जाकि, कृतिम मनू आदि इत्यादि । खँ ल्हानां मब्याः । थ्व झ्वलय् न्हूगु कृतिमया चर्चा वयाच्वंगु दु, व खः कृतिम कुमारित्व । इस्लामिक कट्टरपन्थी देय् इरानय् लिपांगु इलय् कृतिम कुमारित्वया प्रचलन तीव्र रुपं अप्वया वनाच्वंगु दु ।

इरान अथें नं विश्व राजनीतिक जगतय् चर्चाय् वयाच्वंगु छगू देय् खः । आणविक ल्वाभःया कारणं चर्चाया च्वकाय् थ्यनाच्वंगु इरानयात आपालं देशं आर्थिक नाकाबन्दीतकं तयातःगु दु । कट्टरपन्थी इस्लामिक देय्या रुपय् थःगु छाप त्वःतेत सफल थ्व हे इरानय् अनच्वंपिं न्हू पुस्ता धाःसा स्वतन्त्रताया पक्षय् वनाच्वंगु दु । अथे खःसां अन रुढीवादी परम्परागत सोच नं उत्तिकं हावी जुयाच्वंगु दु । थ्व झ्वलय् लिपांगु छगू दसु खः कुमारित्वया परीक्षण ।

छगू इलय् इरानय् कुमारित्वया परीक्षण यायेमाल धाःसा तुयुगु कापःया प्रयोग जुइगु खः । तर हिला वंगु ई व परिस्थितिलिसें मिजं पक्षं इहिपा न्ह्यः मिसाया कुमारित्वया प्रमाण फ्वनेगु यानाच्वंगु दु । उकिया निंतिं मिजं पक्षं कुमारित्वया प्रमाणपत्र माग यायेगु यानाच्वंगु दुसा थज्याःगु स्थितिइ कृतिम कुमारित्व प्राप्त यायेगु चलन नं उत्तिकं अप्वया वनाच्वंगु दु कट्टरपन्थी इस्लामिक देय् इरानय् ।

खतुं लिपांगु इलय् इरानय् छुं छुं सामाजिक हिउपाः हयेगु निंतिं कुतः हे मजूगु धाःसा मखु, अय् नं छुं छुं पुलांगु सोच दुपिनिगु सोच कथं हे अनया समाज न्ह्यानाच्वंगु दु । इहिपा न्ह्यः मिसाया कुमारित्वया प्रमाणपत्र माग यायेगु क्रम अप्वया वयेवं समाजया मिसातय्सं थःगु गोप्य अंगया प्लाष्टिक सर्जरी तकं यायेगु याना हयाचवंगु दु । थुकियात ‘हाइम्नोप्लाष्टि’ धकाः धाइ । थुकिं मिसाया कुमारित्वयात हाकनं कायम याइ ।