ग्यानापुपिं सेलिब्रिटी
अन्तर्राष्ट्रिय सेलिब्रिटीत गुलि गुलि लोकंह्वात उलि हे ग्यानापुपिं जुया वःगु दु । अमेरिकी रियालिटी शोया स्टार किम कार्डिसन थौंकन्हय् तसकं लोकंह्वाःम्ह सेलिब्रटि जुयाच्वंगु दु । तर कार्डिसन गुलि लोकंह्वाः, उलि हे खतरनाक नं जुयाच्वंगु दु । कार्डिसन थौंकन्हय् इन्टरनेटय् यक्व सर्च याइपिं सेलिब्रिटी मध्येय् छम्ह लाः ।
दकलय् अप्वः इन्टरनेटय् सर्च याइम्ह कार्डिसनयात इन्टरनेटय् सर्च यायेगु धाःसा थःगु कम्प्युटरया निंतिं ग्यानापुगु जुयाच्वंगु दु । साइबर सेक्योरिटी फर्म म्याकेफीं थथे इन्टरनेटय् सर्च यायेबलय् ग्यानापुपिं सेलिब्रिटीतय् छगू धलः हे पिकाःगु दु । थ्व धलखय् दकलय् न्ह्यःने कार्डिसनया हे नां लानाच्वंगु दु ।
म्याक्याफेया कथं कार्डिसनया नां सर्च यायेबलय् वया लिसें यक्व हे ग्यानापुगु लिंकत नं वइ, गुगु झीगु कम्प्यूटरया लिसें झीगु सामाजिक सञ्जाल, इमेल आदिया गोपनियता, सुरक्षाया निंतिं तसकं ग्यानापु । सन् २०१७ य् दकलय् ग्यानापुम्ह सेलिब्रिटीया धलखय् क्रेग डेविडया नां लानाच्वंगु खःसा सन् २०१८ य् कार्डिसनया नां दकलय् न्ह्यःने लाःगु खः ।
सुपर मोडेल नाओमी क्याम्बेल थ्व धलखय् निगूगु थासय् लानाच्वंम्ह सेलिब्रिटी खः । अथेहे कार्डिसनया हे केहेँ कोर्टनी कार्डिसन स्वंगूगु थासय् लानाच्वंगु खः । अथेहे बेलायती गायक एडेल प्यम्हम्ह ग्यानापुम्ह सेलिब्रिटी जुयाच्वंगु दुसा क्यारोलिन फ्लेक न्याम्हम्ह ग्यानापुम्ह सेलिब्रिटी जुयाच्वंगु दु ।
म्याक्याफेया कथं ह्याकरतय्सं थुपिं सेलिब्रिटीत दुथ्यानाच्वंगु इन्टरनेट साइटय् छगू विशेष कथंया भाइरस मालवेयर नं घाका हयेगु यानाच्वंगु दु । थ्व मालवेयरया माध्यमं ह्याकरतय्सं युजर्सया व्यक्तिगत जानकारी व पासवर्ड खुयाकायेगु याइ । साइबर अपराधीतय्सं थःपिनिगु अपराध कर्म पूवंकेगु निंतिं न्ह्याबलें सेलिब्रिटीतय् ग्वाहालि कायेगु यानाच्वनी ।
इन्टरनेटय् सेलिब्रिटीत अप्वः सर्च जुइगुलिं यानाः उमिसं लोकंह्वाःपिं सेलिब्रिटीतय्त हे लक्षित यानाः मालवेयर छ्वयेगु यानाच्वनी ।
साइबर अपराधीतय्सं सेलिब्रिटीतय् नां छ्यलाः युजर्सतय् गोपनियता, पासवर्ड खुया कयाच्वंगु खँय् सचेत यासें छुं नं भिडियो, किपा स्वयेबलय् न्ह्याबलें विश्वसनीय वेबसाइट पाखें जक स्वयेत सुझाव बिउगु दु ।
अथेहे सेलिब्रिटीबारे समाचार ब्वने माःसां थःत विश्वास दुगु वेबसाइट पाखें जक स्वयेत धाःगु दु । थुकिया लिसें कम्प्यूटरय् अपडेट जूगु एन्टि भाइरस तयाः नं थज्याःगु आक्रमण पाखें बचे जुयाच्वनेफइ ।
LEAVE YOUR COMMENTS