श्रीपञ्चमी शास्त्रीय संगीत नखः हन

यल (नेपालभाषा टाइम्स)- यल महानगरपालिका वडा १६ कलाकार समितिं लोक, शास्त्रीय संगीतय् समर्पितपिं कलाकारपिनिगु सृजना न्ह्यब्वयाः श्रीपञ्चमी शास्त्रीय संगीत नखः हंगु दु । श्रीपञ्चमीया लसताय् यल लाय्कूलिइ कलाकार विशाखा शाक्यपाखें महामञ्जुश्री चर्यानृत्य न्ह्यब्वयाः न्ह्याःगु ज्याझ्वलय् संगीतया माध्यमं हिउपाः हयेगु नितिं सक्रिय ‘प्लइङ फर चेञ्ज नेपाल’ पाखें मीना प्रजापति, उषा तिवारी, भक्तबहादुर कार्की, सुमीत श्रेष्ठ, आषिश शाक्य, कृष्णदेवी महर्जन, सन्तु महर्जन व सविना महर्जनपिंसं सरस्वती वन्दना हालादीगु खःसा भिन्तुना महर्जन, श्रीजन महर्जन, आगमन महर्जन, सुष्मा श्रेष्ठ, दिपेश तामाङ, निरञ्जना मानन्धर, पदम आले, भिदी क्षेत्री व आकाश तामाङं बाँसुरीया धूनय् फोकलोरी न्ह्यब्वयादीगु खः थुकी मगःखिं थानादीम्ह सीजन महर्जन, धिमे थानादीम्ह प्रतीक महर्जन, टेन्बुरिन थानादीम्ह रामचन्द्र भण्डारी, ताः थानादीम्ह समन महर्जन, गितार थानादीम्ह पेशन श्रेष्ठ खः । थुगु पुचःपाखें विपाशा महर्जन, अलोयाना डंगोल, सुकृति बज्राचार्य, दिपिका महर्जनं हुलाप्याखं न्ह्यब्वयादीगु खः ।

अथेहे वाद्य शिरोमणी गणेशलाल श्रेष्ठया नामय् नीस्वनातःगु वाद्यशिरोमणी संगीत घरानां राग वृन्दावणी सारंग न्ह्यब्वयादिल । थुगु घराना निरन्तर न्ह्याकेगुली सक्रिय शैलेन्द्र शाक्यं तबला थानादीगु थुगु न्ह्यब्वयाय् युनिका बज्राचार्य, जोया महर्जन, स्वीकृति महर्जन, युस्ना महर्जन, रुपक महर्जन, अप्रिलशा महर्जन, आहाना महर्जन, निष्ठा अमात्य, शिक्षा श्रेष्ठ, रुजेन धाख्वा व निभाः बज्राचार्यं भ्वाइलिन थानादीगु खः ।

ज्याझ्वःया स्वंगूगु न्ह्यब्वयाकथं नेवाः लोक संगीतया अभिलेखीकरण यासें संरक्षण व प्रचारया नितिं सक्रिय जुयाच्वंगु प्रोजेक्ट बाजा नेपालं राग चारुकेशीं न्ह्यब्वःगु खः । थुगु न्ह्यब्वयाय् सरोद वादन सुरेशराज बज्राचार्य, मिलन तण्डुकारं बेला वादन, तबला, खिं वादन विपु श्रेष्ठं यानादीगु खः । थुगु हे पुचलं सुरेशराज बज्राचार्यया श्रृजना ‘एराउन्ड द जंगल’ नं न्ह्यब्वःगु खःसा थुकी विजय कायस्थं बबूचा थानादीगु खः ।

यल महानगरपालिका १६ वडा अध्यक्ष निर्मलरत्न शाक्यया सभापतित्व जूगु ज्याझ्वलय् मूपाहां कथं झायादीम्ह यल महानगरपालिकाया मेयर चिरिबाबु महर्जनं अमूर्त सम्पदा संरक्षणय् ललितपुर महानगरपालिका १६ वडां नेतृत्वकारी भूमिका म्हिताच्वंगु न्ह्यथनादिसें महानगरपालिकां थुगु ख्यलय् अझ धिसिलाक्क पलाः छीगु खँ कनादीगु खः ।

ज्याझ्वलय् कलाकारपिनिगु पुचः व ज्याझ्वःया ग्वाहालिमिपिंत सुभाय् पौ, नेवाः पत्रकार राष्ट्रिय दबू केन्द्रीय समिति व नेवाः देय् दबू यल कचाया न्हूगु ज्यासना पुचःयात भिंतुना पौ देछाःगु खः । ज्याझ्वः कलाकार समितिया संयोजक सुरजवीर बज्राचार्य, सचिव अनुप शाक्य व कोषाध्यक्ष सलोना बज्राचार्यं न्ह्याकादीगु खः ।