सेजय् विशेष सुविधा बीत माग

येँ – उद्योगी व्यवसायीतय्सं निर्यात व्यापार अप्वयेकेत व औद्योगिकरणया तीव्र विकासया निंतिं विशेष आर्थिक क्षेत्र (सेज)य् विशेष सुविधा बीमाःगु माग याःगु दु । नेपाल आर्थिक पत्रकार समाज (सेजनं) ग्वसाः ग्वःगु सिमरा क्षेत्रया औद्योगिकरणयात तीव्रता बीत ‘गार्मेन्ट प्रशोधन क्षेत्र’ संचालन सम्बन्धी अन्तक्र्रिया ज्याझ्वलय् उद्यमीतय्सं आवश्यक पूर्वाधार, परियोजना, त्यासा, कच्चा पदार्थ स्वदेशय् हे उपलब्धता लगायतया सुविधा दयेमाःगु माग याःगु खः ।

ज्याझ्वलय् राष्ट्रिय योजना आयोगया पुलांम्ह उपाध्यक्ष डा. शंकर शर्मां देय्या निर्यात अप्वयेकेत व औद्योगिकरणय् सेजया महत्व न्ह्यब्वसें सरकारं थुकीयात विशेष प्राथमिकता बियाः न्ह्याकेमाःगु सुझाव बियादिल । अथेहे पुलांम्ह सचिव पुरुषोत्तम ओझों सिफारिस जूगु थ्यंमथ्यं नीदँ लिपा सिमराय् ‘गार्मेन्ट प्रशोधन विशेष क्षेत्र’ संचालनय् वयेत्यंगुलिं लसता प्वंकादिसें सेजय् वइगु कानुनी व मेमेगु समस्या समाधान यायेत सरकारं ‘दु्रतमार्ग संयन्त्र’ निर्माण यायेमाःगु सुझाव बियादिल ।

अथेहे पुलांम्ह सचिव विमल वाग्लें सेजय् विशेष सुविधा बीमाःगु खँ न्ह्यथँसें सरकारं थुकिया विकासया निंतिं निजीख्यःलिसे सहकार्य यानाः न्ह्याःवनेमाःगु सुझाव बियादिल । घरेलु तथा साना उद्योग महासंघया अध्यक्ष श्याम घिमिरें देय्न्यंकंं सेज नीस्वनेगुअभियान न्ह्यानाच्वंगु धासें स्थानीय तहतक घरेलु ग्राम स्थापना यायेत सरकारया ध्यानाकर्षण यानादिल ।

ज्याझ्वलय् नेपाल पश्मिना उद्योग संघया अध्यक्ष दुराविक्रम थापां उद्योग व्यवसाययात प्रोत्साहन यायेत सरकारया नीति व कार्यक्रम दुसां कार्यान्वयनय् समस्या दुगु खँ कनादिल । थ्व झ्वलय् वय्कलं सेज दुने बन्द हडताल जुल धाःसा क्षतिपूर्तिया व्यवस्थाया बारे न्ह्यसः थनादीगु खः ।

सेजसम्बन्धी ऐन कथं उगु क्षेत्रय् बन्द हडताल याये दइमखु । ज्याझ्वलय् विशेष आर्थिक क्षेत्र प्राधिकरणया कार्यकारी निर्देशक डा. चण्डिकाप्रसाद भट्टं नेपालय् सेज स्थापनाया वर्तमान अवस्था व उद्देश्य बारे न्ह्यथँसें थुकी बीगु सुविधाया बारे जानकारी बियादीगु खः ।