पीप्यक्वःगु नेपालभाषा साहित्य तःमुँज्याया तयारी सुरु

ख्वप(नेपालभाषा टाइम्स)- पीप्यक्वःगु नेपालभाषा साहित्य तःमुँज्या थ्व हे वइगु कौलाथ्व एकादशि व द्वादशि निन्हुयंकं जुइगु जूगु दु । तःमुँज्याया तयारीकथं वंगु सनिवाः च्व सफू ब्वनेज्या जुल । ज्याझ्वलय् नेपाल मजदुर किसान पार्टीया केन्द्रीय सचिवलिसें संघीय सांसद प्रेम सुवालं साहित्य सिर्जना यायेबलय् मौलिक भाषालिसें आदररार्थी व खँग्वः ल्ययेगु खँय् ध्यान बीमाः धयादिल । शारीरिक व बौद्धिक मजदुरया हितय् ज्या याइगु मंकाः दबूया रुपय् साहित्य सिर्जनाय् मौलिक खँग्वःयात ध्यान बीत इनाप यानादिल ।

च्वमिलिसें निर्णायक राजेन्द्र श्रेष्ठं तःमुँज्याय् न्ह्यब्वइगु नाटक, ख्याल, म्येँ आदि थीथी प्रस्तुतियात उद्देश्यकथंया विषयवस्तु व ईयात ल्वःकथंया जुइमाः धयादिल । तःमुँज्याया सल्लाहकार ज्ञानसागर प्रजापतिं नाटक, ख्यालः आदि न्ह्यब्वयेबलय् संवादया दथुइ दथुइ मौलिक उखानयात प्रयोग यायेमाःगु खँय् बः बियादिल ।

तःमुँज्याया नायः आशकुमार चिकंबञ्जारं प्रस्तुति याये योग्य विधाय् विषयवस्तु दुथ्याकेबलय् कौतुहलता, श्रृंगारितायात ध्यानय् तयेत सुझाव बियादिल । तःमुँज्या ग्वसाः खलःया नायःलिसें च्व सफू ब्वने ज्याझ्वःया कजि कृष्णभक्त लवजुं नं नुगःखँ तयादिसें निन्हुयंकं जुइगु तःमुँज्यायात ताःलाकेत सकसिनं थःथःगु थासं फक्व ग्वाहालि यायेत इनाप यानादिल । लिसें वय्कलं तःमुँज्या ताःलाकेत आतक थीथी समिति व उपसमितिपाखें जूगु गतिविधिया बारे नं जानकारी बियादीगु खः ।

ज्याझ्वलय् दुहां वःगु २३ गू नाटक, म्येँ हना प्याखं (गीतिनाटक), ख्यालः, नाटक, म्येँ, चिनाखँमध्ये झिंन्हय्गूया सांस्कृतिक स्क्रिप्ट वाचन यानाः न्यंकूगु खः ।