चीनं यायेफु तःधंगु हे घोषणा

चिनियाँ राष्ट्रपतिया भ्रमण ऐतिहासिक जुइगु

येँ – थ्वहे महिनाया अन्तिम वाःपाखे नेपाः भ्रमणय् वइम्ह चिनियाँ राष्ट्रपति सी जिनपिङया थ्व भ्रमण अतिकं ऐतिहासिक जुइगु अनुमान जुयाच्वंगु दु । नेपाः–चीन स्वापू बारे जानकार सूत्रतय्सं धाः कथं राष्ट्रपति सीया थ्व भ्रमणया झ्वलय् छगू अज्याःगु तःधंगु घोषणा जुइत्यंगु दु गुकिं चिनियाँ राष्ट्राध्यक्षत नेपाः मवःगु २३ दँ दत धइगु गुनासोयात पूवंक हे हुया छ्वयेगु ज्या याइ ।

सूत्रं धाः कथं थ्व छगू चीनपाखें नेपाःया हितय् याइगु ‘सरप्राइज घोषणा’ जुइ । चिनियाँ राष्ट्रपतिं अज्याःगु घोषणा याइ धकाः तयारी जुयाच्वंसां आः तक उकियात चीनं गोप्य हे यानातःगु खँ नं सूत्रं धाःगु दु । नेपाली कुटनीतिक ख्यलय् चीनं सरप्राइज घोषणा याइगु जुल धइगु जानकारी जक वःगु दु तर छु घोषणा याइ धइगु खँय् धाःसा केवल अनुमान जक जुयाच्वंगु दु ।

चिनियाँ राष्ट्रपतियात लसकुस यायेत तयारी यानाच्वंगु नेपाली कुटनीतिक ख्यलय् नं थुकिया बारे अनुमानया चर्चा जक जुयाच्वंगु खँ सूत्रं धाःगु दु । चिनियाँ राष्ट्रपतिलिसे वार्ता यायेगु लागिं धकाः खास यानाः न्हय्गू एजेण्डा तय जूगु खँ सूत्रं धाःगु दु । थुकी केरुङ–येँ रेल मार्ग, कोदारी राजमार्ग, रसुवागढी–येँ सतकमार्ग, मुस्ताङका कोरला नाका व संखुवासभाया किमाथांका नाका चायेकेगु बारे तयारी, मदन भण्डारी विश्वविद्यालय निर्माण थेंज्याःगु विषयय् सहलह जुइगु खँ दुथ्याः ।

तर चीनं याइगु तःधंगु सरप्राइज घोषणा धाःसा थ्व स्वयां फरक जुइगु खँ धाःगु दु । कुटनीतिक सूत्रं थ्व तःधंगु घोषणा धइगु सम्भवतः नेपालय् रेलमार्ग दयेका बीगु खँ जुइफु धकाः अनुमान याःगु दु । केरुङंनिसें येँय् तक थ्यनीगु थ्व रेलमार्ग तसकं थिके जुइगु कारणं नेपालं दयेके फइगु सम्भावना मदु ।

तर चीनं हयाच्वंगु वन बेल्ट वन रोड नीतिया लागिं थ्व छगू महत्वपूर्ण लँपु जुइगु कारणं मदयेकुसें मगाःगु अवस्था नं दु । उकिसनं येँय् तक भारतीय रेल दुहां वइगु सम्भावना नं अप्वया वनाच्वंगु दु । थज्याःगु पृष्ठभूमिइ न्ह्याक्व हे थिकेगु खःसां थ्व रेलमार्ग छपु पूवंक हे चीनं दयेका बी धइगु घोषणा जुइ फइगु अनुमान नेपाःया कुटनीतिक ख्यलं यानाच्वंगु दु ।

सम्बन्धित बुखँ

LEAVE YOUR COMMENTS