निगू नगरपालिकाया ल्वापु नगरकोट प्रवेश शुक्ल विवाद
ख्वप – निगू नगरपालिका दथुइ समन्वय मजुइवं नगरकोट वनीपिं विदेशी पर्यटकतय्सं निथाय् निथाय् कर पुलेमालाच्वंगु दु । ख्वपया चाँगु नारायण नगरपालिका व काभ्रेया मण्डन देउपुर नगरपालिका दथुइ समन्वय मजूगुलिं निथाय् निथाय् कर पुलेमाःगु अवस्था वयाच्वंगु खः ।
चाँगुनारायण नगरपालिकां आर्थिक दँ २०७४÷७५ य् ५१ लाख तकां नगरकोट वनीपिं पर्यटकतय्के प्रवेश शुल्क म्हयेगु ठेक्का बिसानिसें निगू नगरपालिका दथुइ विवाद ब्वलंगु खः । चाँगुनारायणं चालु आर्थिक दँ २०७५÷७६या निंतिं स्वंगू करोड २५ लाख तकां ठेक्का बिउगु दु । थुकिया निंतिं चाँगुनारायण नगरपालिका वडा नं. ६या तेलकोट व वडा नंं ८ या कलमसीमाय् च्वनाः शुल्क म्हया वयाच्वंगु दु ।
थुकिया लिसें विश्वसम्पदा सुचीइ लानाच्वंगु चाँगुनारायण वनेगु लँय् च्वनाः नं ठेकेदारं शुल्क म्हयाच्वंगु दु । चाँगुनारायण नगरपालिकाया मेयर सोम मिश्रं नगरकोटया विकासया निंतिं निगू नगरपालिका दथुइ समन्वय यानाः न्ह्याः वनेगु खँ राससयात कनादीगु दु । वय्कलं आः निखेरं कर म्हयेगु अवस्था मवयेकेगु निंतिं सहलह यायेगु खँ नं धयादीगु दु ।
थ्वहे दथुइ काभ्रेया मण्डन देउपुर नगरपालिकां चालु आवनिसें नगरकोट वनीपिं पर्यटकतय्त शुक्ल कायेगु निंतिं सुचं पिथंगु दु । मण्डन देउपुरं काभ्रेचोक, भ्युटावर चोक व कात्तिक क्षेत्रय् वइपिं पर्यटकतय्के प्रवेश शुल्क म्हयेगु निंतिं ठेक्का आह्वान याःगु खः ।
मन्डन देउपुर नगरपालिकाया मेयर टोकबहादुर वाइबां राससलिसे खँ ल्हासें धयादीगु दु, ‘न्हापा निगुलिं नगरपालिका जानाः एकीकृत रुपं कर म्हयेगु धयागु खः, याकःचां म्हल । थ्व दँय् नं सहलह यायेत स्वयागु खः, चाँगुनारायण याकःचां ठेक्का बिल । थ्व लिपा होटल व्यवसायीय् सल्लाह कथं हे जिमिसं नं ठेक्का बियागु खः ।’
मण्डन देउपुर नगरपालिकां छगू करोड ३० लाख तक्कां ठेक्का बिउगु खँ वय्कलं धयादीगु दु । नगरकोटया पर्यटन व्यवसायीतय्सं निगू नगरपालिकां दोहोरो कर म्हयाच्वंगुलिं नगरकोटया भविष्य हे अन्योलय् लानाच्वंगु खँ धाःगु दु । नगरकोटल नाल्दुम पर्यटन विकास समितिया सचिव धनबहादुर लामां दोहोरो पर्यटन शुल्कं पर्यटन व्यवसायीतय्त मार लाइगु खँ कनादिल ।
LEAVE YOUR COMMENTS