देय् दबू ख्वप नगरया न्हापांगु तःमुँज्या

ख्वप(नेपालभाषा टाइम्स)-नेवाः देय् दबू ख्वप नगर कमिटीया न्हापांगु तःमुँज्या वंगु शनिवाः जुल । उगु तःमुँज्यां देय् दबूया ख्वप नगर कमिटी नं गठन याःगु खः ।

ख्वप नगर तदर्थ कमिटीया नायः कृष्णप्रसाद प्रजापतिया सभापतित्वय् न्ह्याःगु तःमुँज्याया उलेज्या देय् दबूया पुलांम्ह केन्द्रीय सल्लाकारसलिसें सिद्धिदास प्रतिष्ठानया नायः नरेन्द्रभक्त हाडां यानादीगु खः ।

ज्याझ्वलय् देय् दबूया धरानय् जूगु न्हय्क्वःगु तःमुँज्यां केन्द्रीय मिसा कवलय् निर्वाचित जुयादीम्ह सपना बादे श्रेष्ठयात तगः तपुलिं पुइकाः हनेज्या याःगु खः ।

तःमुँज्यां कृष्णप्रसाद प्रजापतिया अध्यक्षताय् झिंस्वम्हेसिया ख्वप नगर कमिटी नं गठन याःगु खः। कमिटीया न्हूगु ज्यासना पुचलय् सुनिल ग्वाछा वरिष्ठ न्वकु, राजमाया कोजू न्वकु, शर्मिला सुवाल मिसा न्वकु, विश्वराम लागे छ्याञ्जे, रेणु कर्माचार्य लिउ छ्याञ्जे व प्रभाकर वज्राचार्य दांभरिं ल्यःगु दुसा दुजलय् राजेश दुवाल, सुमन प्रजापति, सरिता प्रजापति, सुरोज रंजितकार, सागर मलेकार व राकेश रंजितकारयात ल्यःगु दु ।

तःमुँज्याय् देय् दबू स्वनिगः विशेष प्रदेशया नायः श्रीकृष्ण महर्जन, न्वकु सुमन श्रेष्ठ, छ्याञ्जे हरिबहादुर श्रेष्ठ, ख्वप जिल्ला नायः नरेश नेवाः, ओम धौभडेल, महेश द्यःला, ओमचरण अमात्य लगायतं नुगःखँ तयादीगु खः ।