ने. सं. ११४४ चौलागा अष्टमी -

नेवाः–ताम्सालिङया प्रदर्शन

येँ – प्रदेश नम्बर ३ या नां ‘नेवाः ताम्सालिङ प्रदेश’ तयेमाःगु माग यासें म्हिगः आदिवासी जनजातितय्पाखें येँया माइतीघर मण्डलाय् वृहत् प्रदर्शन यात । नेवाः ताम्सालिङ संघर्ष समितिया ग्वसालय् जूगु उगु धर्ना ज्याझ्वलय् जातीय आधारय् प्रदेशया नां तयेमाःगु माग याःगु खः । अथेहे आदिवासी जनजाति बसोबास यानाच्वंगु थाय्यात विशेष संरक्षित क्षेत्र घोषणा यायेमाःगु माग नं उमिसं याःगु खः ।

प्रदर्शनया झ्वलय् देय् दुनेया जनतां ल्हाइगु फुक्कं कथंया भाय्यात सरकारी ज्याखँया भाय् दयेकेमाःगु व मांभाय्या माध्यमं ब्वनेगु लागि सरकारं व्यवस्था यायेमाःगु माग यासें प्लेकार्ड नं प्रदर्शन याःगु खः । नेवाः व तामाङ समुदायया बाहुल्यता दुगु प्रदेश नम्बर ३ या नां नेवाः ताम्सालिङ प्रदेश तयेमाःगु खँय् सरकारयात दवाव बीत म्हिगः उगु धर्ना बिउगु खः । नेवाः व तामाङ समुदायया परम्परागत भेषभुषा पुनाः प्रदर्शन याःगु खःसा प्रदर्शनया झ्वलय् प्रदेशय् म्हो जनसंख्या दुगु समुदाययात विशेष, संरक्षित व स्वायत्त क्षेत्र घोषण यायेमाःगु माग यासें अन नाराबाजी नं याःगु खः ।

वंगु छुं न्हिं न्ह्यवंनिसें नेवाः ताम्सालिङ क्षेत्र घोषणा यायेमाःगु माग यासें थीथी थासय् राजनीतिक ज्याझ्वः याना वयाच्वंगु दु ।

राजधानी विवादं अझं धनगढी बन्द
येँ – प्रदेश नम्बर ७ या राजधानी विवादं यानाः धनगढी म्हिगः नं पूर्ण रुपं बन्द जुल । नेपाली कांग्रेसया नेतृत्वय् जूगु बन्द आह्वानयात उद्योग वाणिज्य संघ, कैलाली, प्याब्सन, एन प्याब्सन व बस व्यवसायीतय्सं समर्थन याःगु खः । प्रदेशसभां वंगु शुक्रवाः प्रदेशया स्थायी राजधानी गोदावरी नपाय् तयेगु व प्रदेशया नां सुदूरपश्चिम तयेगु निर्णय दुई तिहाइ बहुमतं पारित याःगु खः । मेखे राजधानी तयेगु थाय्या बारे विरोध जुयाच्वंगु इलय् प्रदेश सरकारं स्थायी राजधानी गोदावरीइ तयेगु निंतिं भौतिक संरचना दयेकेत विस्तृत अध्ययन प्रतिवेदन (डीपीआर) तयार यायेगु प्रक्रिया न्ह्याकूगु दु ।