ने. सं. ११४४ चौलाथ्व दशमी -

नेपाःया स्वर्ण २३ गू थ्यन, १ मिलिसेकेन्डं सन्तोषीयात एथलेटिक्सय् स्वर्ण

येँ – झिंस्वक्वःगु दक्षिण एशियाली कासा (साग)य् नेपाःया स्वर्ण ल्याः नीस्वंगू थ्यंगु दु । मंगलवाः जूगु थीथी कासाय् नेपालं च्यागू स्वर्ण थप यायेवं नेपाः २३ गू स्वर्ण सहित पदक धलखय् शीर्षथासय् दु । सोमवाः झिंन्यागू स्वर्ण ल्हातय् लाकूगु नेपाःया निंतिं मंगलवाः उसुं निगू, करातें निगू, तेक्वान्डों निगू, ट्रायथोलन अन्तर्गतया डुआथलनं छगू व एथलेटिक्सं छगू स्वर्ण वःगु खः ।

म्हिगःया दकलय् न्ह्यइपुगु स्वर्ण सन्तोषी श्रेष्ठं एथलेटिक्सया १०००० मिटर ब्वाज्याय् त्याकूगु स्वर्ण जुल । सन्तोषीं थ्व ब्वाज्या १ मिलिसेकेन्डं जक त्याकाः स्वर्ण ल्हातय् लाकूगु खः । सन्तोषीं थ्व ब्वाज्या ३५ मिनेट ७.९४ सेकेन्डं पूवंकूगु खःसा वयात लिफ्यायेत वयाच्वंम्ह भारतया कविता यादव १ मिलिसेकेन्डं जक लिउने लाःगु खः ।

नेपालं मिस्तय् पाखे एथलेटिक्सय् दक्षिण एशियाली स्तरय् स्वर्ण त्याकूगु नं थ्व हे न्हापांखुसी जूगु दु । थ्वयां न्ह्यः श्रीलंकाय् जूगु २००६ या साग कासाय् कान्छिमाया कोजुं त्याकूगु रजत पदक हे आःतकया नेपाःया दकलय् उत्कृष्ट प्रदर्शन जुयाच्वंगु खः ।

तेक्वान्डोय् ४६ केजीं क्वय्या तौल समूहय् काजल श्रेष्ठं व ६८ केजी तौल समूहय् बीरबहादुर महरां स्वर्ण ल्हातय् लाकूगु खः । काजलं पाकिस्तानी कासामि ५०–१४या ल्याखं बुकूगु खःसा बीरबहादुरं नं पाकिस्तानी कासामियात हे ४१–३६या ल्याखं बुकूगु खः । अथेहे करातेय् कुमिते पाखे सुनिता महर्जनं ६८ केजी तौल समूहय् स्वर्ण त्याकूगु खःसा नवीन रसाइलीं ६७ केजी तौल समूहय् स्वर्ण त्याकूगु खः । सुनिता व नवीन निम्हेसिनं पाकिस्तानी प्रतिद्वन्द्वीयात बुकाः स्वर्ण ल्हातय् लाकूगु खः ।

अथेहे उसुया थाउलो छान्क्वानय् मिजंतय् पाखे विजय सिञ्जाली व मिस्तय् पाखे सुस्मिता तामाङं स्वर्ण त्याकूगु खः । सिञ्जालीं बंगलादेशी कासामि मोहम्मद ओमार व श्रीलंकाया सौम्य प्रभाकरयात लिउने लाकाः स्वर्ण ल्हातय् लाकूगु खःसा तामाङं बंगलादेशया नूर बहार बेगम व श्रीलंकाया थाग बाग्सालायात लिउने लाकूगु खः ।

पोखराय् जूगु डुआथलनय् हिमाल टमाटां स्वर्ण त्याकूगु खः । डुआथलनय् न्हापां ब्वाज्या, अनं साइकलिङ्ग, हाकनं ब्वाज्या जुइ । थ्व धेंधेंबल्लाखय् नेपाःया लक्ष्मण मल्लं रजत त्याकूगु खः ।