
येँ – वइगु महिनाय् नामिबियाय् जुइगु आइसिसी वल्र्ड क्रिकेट लिग निगूगु डिभिजनया निंतिं पारस खड्काया नेतृतवय् झिंप्यम्ह दुजः दुगु राष्ट्रिय टिम घोषणा याःगु दु । बिहिवाः घोषणा याःगु टिमय् ज्ञानेन्द्र मल्ल (उपकप्तान), शक्ति गौचन, बसन्त रेग्मी, शरद भेषवाकर, सोमपाल कामी, करण केसी, मोहम्मद आरिफ शेख, दीपेन्द्रसिंह ऐरी, सन्दीप लामिछाने, दीलिप नाथ, ललितसिंह भण्डारी, अनिलकुमार शाह, रोहितकुमार पौडेल मू कासामि कथं दुथ्याःगु दुसा वैकल्पिक कासामिइ कथं सुनिल धमला, ललितनारायण राजवंशी, विकास महतो व सिद्धान्त लोहनी दुथ्याःगु दु । थुपिं मध्ये अनिलकुमार शाह व रोहित कुमार पौडेलं न्हापांखुसी राष्ट्रिय टिमय् थाय् दयेकूगु खः ।
आइसिसी प्रतिनिधि अमिनुल इस्लाम, प्रशिक्षक जगत टमाटा व कप्तान पारस खड्काया पुचलं मेपिं कासामि ल्यःगु खः ।
नेपाली टिमय् नामिवियाय् म्हितः वने न्ह्यः माघ १३ शनिवाः युएईया भ्रमण याइ । थन नेपाली टिमं स्वंगू अभ्यास म्याच म्हिती । थनं माघ २१ गते नामिबियापाखे वनी ।
निगूगु डिभिजनया कासा माघ २५ निसें सुरु जुइ । वंगु असोजय् आइसिसी वल्र्ड क्रिकेट लिगया शीर्ष प्यंगूगु थासय् लाकेमफुगुलिं नेपाः निगूगु डिभिजनय् कुहां वःगु खः । निगूगु डिभिजनय् खुगू टिम दथुइ धेंधेंबल्लाः । थुकी शीर्ष निगूगु थासय् लाःगु टिमं २०१८ मार्चय् जिम्बावेय् जुइगु वान डे क्वालिफायरय् म्हितेखनी ।
LEAVE YOUR COMMENTS