मेक्सिकोयात इतिहास च्वयेगु ह्वःताः

एजेन्सी- विश्वकप नकआउट चरणय् दकलय् न्हापां ब्राजिल व मेक्सिको दथुइ कासा जुइत्यंगु दु । सन् १९९४ निसें लगातार विश्वकप म्हिताः निगूगु चरण तक जक थ्यनाच्वंगु मेक्सिकों थौं थनं थहां वनेगु निंतिं न्याक्वःतकया विश्व च्याम्पियन ब्राजिलयात बुकेमाःगु दु । तर मेक्सिको लिसे ब्राजिलया खेल इतिहास स्वयेगु खःसा ब्राजिल तसकं बल्लाःगु खनेदयाच्वंगु दु । ब्राजिल व मेक्सिको दथुइ आःतक ४० गू कासा जुइधुंकूगु दु । अथेहे विश्वकपय् जक प्यंगू प्यक्वः आमने सामने जुइधुंकूगु दु । विश्वकपय् म्हितूगु कासाय् मेक्सिकों ब्राजिलयात त्याकेगु ला छु छगू गोल तक नं नकेफुगु मदुनि ।

तर थुगुसी न्हापांगु कासाय् हे डिफेन्डिङ च्याम्पियन जर्मनीयात बुकावःगु मेक्सिकों उच्च मनोबल साथ मैदानय् कुहां वइगु जुइ । थुगुसी तुलनात्मक रुपं बांलाक म्हिताच्वंगु मेक्सिकों ब्राजिलयात नं दबाबय् लाकेफु ।

मेक्सिकोया कप्तान एन्डङरस गुयरदाडों न्याक्वःतकया विश्व च्याम्पियन ब्राजिलयात बुकाः क्वार्टरफाइनल वनेत थःपिं सक्षम दुगु खँ धाःगु दु । मेखे विश्वया उत्कृष्ट कासामि कथं नांजायाच्वंपिं लियोनल मेसी व रोनाल्डो विश्वकपं पिने लायेधुंकूगु अवस्थाय् थौं मेम्ह विश्व उत्कृष्ट कासामि व ब्राजिलया कप्तान नेयमार थःत प्रमाणित याना क्यनेमाःगु दबाबय् दु । तर ब्राजिलयात त्याकेगु खःसा मेक्सिकों नेयमारयात जक ध्यान बियाः गाइमखु । ब्राजिलया आक्रमण पंक्ति नेयमार लिसें फिलिप कोटिन्हो थेंज्याःपिं कासामि दु ।

ब्राजिलयात धाःसा मेक्सिकोया रोड्रिग लोथानो खतरा जुइफु । रोड्रिगं हे जर्मनीविरुद्ध गोल याःगु खः ।

थौं हे मेगु कासा जापान व बेल्जियम दथुइ जुइ । भाग्यं निगूगु चरणय् दुहां वंगु जापानयात थुगुसी थःगु फुटबल इतिहासया हे दकलय् बांलाःगु टिम दुगु बेल्जियमयात बुके अःपुइ मखु । लिग चरणय् स्वंगुलिं कासा त्याकावःगु बेल्जियम टिमय् रोमेलु लुकाकु, इडेन हेजार्ड थें ज्याःपिं स्टार कासामितय्सं जायाच्वंगु दु ।

जापानया डिफेन्डर माया रोसिदां थःपिं बेल्जियमयात पनेत सक्षम दुगुखँ धाःगु दु ।

सम्बन्धित बुखँ

LEAVE YOUR COMMENTS