प्रमुख कार्यकारी अधिकृत नियुक्तिइ राष्ट्र बैंकया पंगः
येँ – नेपाल राष्ट्र बैंकं बैंक व वित्तिय संस्थाया प्रमुख कार्यकारी अधिकृत नियुक्ति ‘फिट एण्ड प्रोपर टेस्ट’ पाखें याइगु जूगु दु। थुगु विषयसं राष्ट्र बैंकया गभर्नर डा. चिरञ्जिवी नेपालं थीथी ज्याझ्वलय् न्ववायेगु झ्वलय् सीईओ नियुक्ति बैंकया सञ्चालक समितिया जक जिम्मेय् मबीगु खँ धायेगु याना वयाच्वंगु दु ।
गभर्नर नेपालं पिने देय्या उदाहरण बिसें सम्बन्धी संस्थाया सिफारिसय् केन्द्रीय बैंकं माःगु अध्ययन यानाः नियुक्तिया निंतिं लँ चायेकाबीगु खँ धायेगु यानाच्वंगु दु। अन्तर्राष्ट्रिय प्रचलन कथं हे नेपालय् नं प्रमुख कार्यकारी नियुक्त यायेगु वय्कःया धापू दु। अर्बौ सर्वसाधारणपाखे कयातःगु निक्षेप परिचालन याइगु बैंकय् सिमित शेयर दुपिं सञ्चालकयात जक कार्यकारी नियुक्तिया जिम्मा बीमफइगु गभर्नर नेपालया धापू दु ।
थुकिया कयाः राष्ट्र बैंकं प्रमुख कार्यकारी नियुक्तिया मोडालिटी दयेकेगु ज्या न्ह्याकेधुंकूगु द । राष्ट्र बैंकं नीति दयेकेगु तयारी यानाच्वंगु इलय् बैंकया सञ्चालक समिति व राजनीतिक वृत्त धाःसा विरोध यायेगु ज्या न्ह्याकूगु दु ।
राष्ट्र बैंक स्रोतया कथं बैंकया प्रमुख कार्यकारी अधिकउत राष्ट्र बैंकं थम्ह ल्यइगु मखु। सम्बन्धित बैंकं सीईओ नियुक्त यायेमाल धाःसा स्वम्हेसिया नां सिफारिस यायेमाः । स्वम्हेसिया बारे राष्ट्र बैंकं माःगु अध्ययन याइ । उकि मध्ये सुं हे प्रमुख कार्यकारी जुइत गोग्य मदु धइगु राष्ट्र बैंकयात तालधाःसा राष्ट्र बैंकं कारण सहित लिखित जवाफ बैंकयात बी ।
सिफारिस याःपिं स्वम्हं योग्य दुसा राष्ट्र बैंकं स्वीकृति बी । वयां लिपा बैंकं थःपिसं सिफारिस यानापिं स्वम्ह मध्ये छम्हेसित बैंकया प्रमुख कार्यकारी अधिकृत नियुक्त याये दइ ।
LEAVE YOUR COMMENTS