रियल म्याड्रिड शीर्षथासय्

स्पेनिस ला लिगाय् रियल म्याड्रिड शीर्ष थासय् वःगु दु । रियलया घरेलु मैदानय् जूगु कासाय् स्पानियोलयात १–० बुकेवं रियल शीर्षस्थानय् थहां वःगु खः । कासाया ४१ औं मिनेटय् मार्को एसेन्सिओं छगू जक विजयी गोल याःगु खः। मार्को याःगु गोल भिडियो असिन्टेट रेर्फीया ग्वाहालिं मान्यता बिउगु खः ।

लुका मोड्रिकं याःगु प्रहार गोल मजुसे लिहांवःगु बलय् एसेन्सिओं गोल याःगु खः। रेर्फीं ताहाकःगु भिएआर रिभ्यु लिपा गोल मान्यता बिउगु खः । रियल स्वयां छगू कासा कम म्हितूगु बार्सिलोना लिगया निगूगु थासय् दु । ला लिगा अन्तर्गत जूगु मेगु कासाय् एथ्लेटिको म्याड्रिडं गेटाफेयात २–० गोलं बुकल ।

इटालियन सिरी ए पाखे इन्टरमिलानं साम्पाडोरियायात १—० गोलं बुकल । भिडियो असिस्टेन्ट रेफ्री भिएआरं स्वंगू गोल मान्यता मबिउगु कासाय् ९४ औं मिनेटय् ब्रोजोविकं गोल मिलान विजय जूगु खः । कासाय् इन्टर मिलानया क्वाड्वो एसामोएह व राड्जा नाइग्गोलज याःगु गोलयात भिएआरं मान्यता मबिउगु खः ।

अथेहे साम्पाडोरियाया गे्रगोर डिफ्रेलं याःगु गोलयात न भिएआरं गोल मबिउगु खः । निगू कासा त्याःगु इन्टर मिलान लिगया न्हय्गूगु थासय् दु ।जर्मन बुन्डेस लिगाय् शाल्केयात बार्यन म्युनिखं २—० गोलं बुकूगु दु । बार्यनया निंतिं कासाया न्हापांगु हाफया ८ औं मिनेटय् जेम्स रोड्रिग्वेज व निगूगु हाफया ६४ औं मिनेटय् रोबर्टो लेवान्डोस्कीं पेनाल्टी पाखें गोल याःगु खः । साविक विजेता बार्यन म्युनिख लिगया शीर्ष थासय् दु ।