
येँ–प्रदेश नं ५ य् सरकार गठनया तयारी शुरु जूगु दु । सरकार गठनया निंतिं वाम गठबन्धनं थःपिनिगु दावी पेश याःगु दु ।
सभामुखया निर्वाचन स्वयां न्ह्यः हे चिधंगु आकारया मन्त्रिमण्डल गठन यायेगु ल्याखं वाम गठबन्धनं सरकार गठनया निंतिं दावी पेश याःगु खः । एमालेया भागय् लाःगु प्रदेश नं. ५ य् संसदीय दलया नेता शंकर पोखरेलयात मुख्यमन्त्री नियुक्त यायेत माग यासें प्रदेश प्रमुख उमाकान्त झा समक्ष दावी पेश याःगु खः ।
प्रदेश नं. ५ य् सरकार गठनया निंतिं स्पष्ट बहुमत दुगु वाम गठबन्धनया एमाले व माओवादीया नेतातय्सं प्रदेश प्रमुखयात मुख्यमन्त्री नियुक्त यायेत इनाप याःगु खः । एमालेया संसदीय दलया नेता पोखरेल, एमाले उपमहासचिव विष्णु पौडेल, माओवादी केन्द्रया नेता वर्षमान पुन व कुलप्रसाद केसी लगायतया नेतात प्रदेश प्रमुखयाथाय् सरकार गठनया निंतिं प्रदेश प्रमुखयाथाय् वंगु खः ।
चुनाव न्ह्यः हे जूगु वाम गठनबन्धन दथुइ पोखरेलयात ५ नं. प्रदेशया मुख्यमन्त्री दयेकेगु सहमति जूगु खः ।
प्रदेश नं. ५ य् फागुन २ गते सभामुखया निर्वाचन जू वनाच्वंगु दुसा व स्वयां न्ह्यः हे चिधंगु आकारय् मन्त्रिमण्डल गठनया तयारी वाम गठबन्धनं याःगु खः । आः निंतिं चिधंगु आकारय् गठन जुइगु मन्त्रिमण्डलय् पोखरेल मुख्यमन्त्री जुइगु जूगु दुसा एमाले व माओवादीपाखें छम्ह छम्ह मन्त्री जुइगु सम्भावना खने दयाच्वंगु दु ।
LEAVE YOUR COMMENTS