ने. सं. ११४४ ञलाथ्व दशमी -

ओम धौभडेल व जितेन्द्र रसिकया सफू विमोचन

ख्वप – संस्कृतिविद् ओमप्रसाद धौभडेलं च्वयादीगु ‘भक्तपुर दरवारका मल्लकालीन भारदारहरू’ व साहित्यकार जितेन्द्र रसिकं च्वयादीगु ‘अलकापुरी भक्तपुर’ नांगु सांस्कृतिक सम्पदासम्बन्धी निगू सफू पुरातत्व विभागया महानिर्देशक भेषनारायण दाहालं विमोचन यानादिल ।

सफु विमोचन यानादिसें वय्कलं पुरातत्व विभागं तकं याये मफयाच्वंगु व पूमवंगु ज्या थुगु सफुतिं यानाक्यंगु न्ह्यथँसें आः थुगु सफूया आधार कयाः ख्वपया थीथी सम्पादाया पुनःनिर्माणया लागिं पुरातत्व विभागं पहल यायेगु बचं बियादिल ।

संस्कृतिविद् तेजेश्वरबाबु ग्वंगलं भानुभक्तं अबलय् न्हापां ख्वप देय् खंगु जूसा उगु इलय् हे ‘अलकापुरी भक्तपुर’ धकाः च्वइगु खइ धासें न्हापां कान्तिपुर खंगुलिं जक ‘अलकापुरी कान्तिपुरी नगरी’ च्वःगु खँ कनादिल । साहित्यकार जितेन्द्र रसिकं थम्हं सफू थःगु मौलिक कृति मखुगु खुलासा यानादिल ।

संस्कृतिविद् ओम धौभडेलं हरेक कृति लेखकया लागिं थःम्ह सन्तान थें जुइगु न्ह्यथँसें भारदारया बारे श्रोत व प्रमाणया आधारय् थुगु ऐतिहासिक खँयात माः हनेगु ज्या जक थम्हं यानागु खः धयादिल ।

भक्तपुर साहित्यिक समाजया अध्यक्ष राजुराम मुनंकःमिया सभापतित्वय् जूगु ज्याझ्वलय् सफूया समीक्षा यानादिसें डा. योगीप्रसाद सुवेदीं ख्वप देय् छगू खुल्ला म्युजियम जूगु व ख्वपया सम्पदा सकल राष्ट्रया हे सम्पदा जूगु न्ह्यथनादिसें थुगु निगू सफुतिं आः मेमेगु नं अनुसन्धान यायेत लुखा चायेकेगु ज्या याइगु विश्वास प्वंकादिल ।