धरहरा जःखः संरचना दयेके मदइगु पसः कवः दक्वं खाली याइगु

येँ – धरहरा परिसर व उकिया जःखःया लागाय् छुं नं न्हूगु संरचना दयेके मबीगु खँय् सहमति जूगु दु । राष्ट्रिय पुनःनिर्माण प्राधिकरण व येँ महानगरपालिका दथुइ धरहरा जःखः न्हूगु संरचना दयेके मबीगु खँय् सहमति जूगु खः । प्राधिकरणया प्रमुख कार्यकारी अधिृकत युवराज भुसालया संयोजकत्वय् सरोकारवाला निकाय दथुइ च्वंगु मुँज्यां उगु निर्णय याःगु खः ।

प्राधिकरणया ज्याकू सिंहदरवारय् च्वंगु मुँज्याय् येँ महानगरपालिकालिसें पुरातत्व विभाग, गुथि संस्थान लगायतया निकायया दथुइ च्वंगु मुँज्यां धरहरा पुनःनिर्माणयात लिच्वः लाके फइगु धासें उकथं संरचना निर्माण याके मबीगु निर्णय याःगु खः ।

थ्व हे झ्वलय् गुथि संस्थानं थःपिंसं हकभोग याना वयाच्वनागु जग्गा प्रयोग याये दयेमाःगु धारणा संस्थानया निमित्त प्रमुख दीपकबहादु पाण्डें तयादीगु खःसा संस्थानं अज्याःगु जग्गाय् ठेक्कापट्टाया ज्या बियातःगु खःसा उकियात नं तत्काल रद्द यायेत प्राधिकरणं निर्देशन बिउगु दु ।

अथे हे बैठकं धरहरा परिसरय् तयातःगु दक्वं पसः कवः बाःछिया दुने खाली यायेगु नं सहमतिय याःगु दु । येँ महानगरपालिकां धरहार जःखः तयातःगु दक्वं पसः कवः खाली याकेगु नापं उगु लागाय् च्वंगु गोश्वारा हुलाक, नेपाल राष्ट्र बैंक थेंज्याःगु सरकारी ज्याकू नं स्थानान्तरणया निंतिं इनाप यायेगु निर्णय याःगु दु ।

बैठकय् प्राधिकरणया कार्यकारी प्रमुख अधिकृतलिसें पदाधिकारी नापं येँ महानगरपालिकाया प्रमुख विद्यासुन्दर शाक्य, येँ मनपाया प्रमुख प्रशासकीय अधिकृत यादव कोइराला, प्रमुख जिल्ला अधिकारी केदारनाथ शर्मा, पुरातत्व विभागया महानिर्देशक भेषनारायण दाहाल, संस्थानया निमित्त प्रमुख पाण्डे, येँ मनपा २२ वडाया वडाअध्यक्ष चिनिकाजी महर्जन लगायतया सहभागिता दुगु खः ।

सम्बन्धित बुखँ

LEAVE YOUR COMMENTS