जातीय पहिचान व भाषिक अधिकार सफूयात कयाः अन्तर संवाद

ख्वप(नेपालभाषा टाइम्स)÷ नेपालभाषाया च्वमि डा. बालगोपाल श्रेष्ठं च्वयादीगु ‘नेपालय् जातीय पहिचान व भाषिक समान अधिकारया न्ह्यसः’ सफूयात कयाः अन्तर संवाद ज्याझ्वः जुल । सिद्धि स्मृति प्रतिष्ठानया ग्वसालय् उगु ज्याझ्वः जूगु खः ।

प्रतिष्ठानया नायः नरेन्द्रभक्त हाडाया सभापतित्वय् जूगु ज्याझ्वलय् ज्याझ्वःया प्रमुख व्यक्ति नापं सफूया च्वमि डा. श्रेष्ठं सफूया विषययात कयाः थःगु नुगःखँ तयादीगु खः । अन्तर संवाद ज्याझ्वलय् वय्कलं दक्वं खलः, पुचः संघसंस्थाया प्रतिनिधित्व यानाः नेवाःतय्गु राष्ट्रिय संगठनया रुपय् नेवाः देय् दबू पलिस्था यायेगु ज्या जूसां उकिं अबलय् खास हे ज्या मयाःगुलिं त्वाः त्वालय् च्वंगु नेवाःतय् खलः, पुचः, संघसंस्थायात हे सक्रिय याना यंकाः प्रत्येक व्यक्तियात प्रभावित यायेफुसा जक नेवाः जाति व नेवाः आन्दोलनं काःगु लक्ष्य पूवंके फइगु खँ हे थःगु सफुतिइ दुथ्याकागु खँ न्ह्यथनादिल ।

वरिष्ठ आधुनिक कवि डा. योगन्द्र प्रधानं झी नेवाःतय्सं राजनीतिया रणनीति थुइके मफुगुलिं हे लिउने लानाच्वंगु खः धासें लिच्छवी, मल्ल व शाहतय्सं तकं व हे रणनीतिकथं प्रशासन व आर्थिक ख्यलय् थःपिनिगु पकड बल्लाका यंके फुगुलिं इमि च्वन्ह्याः वंगु व इमिगुपाखें हे मेमेगु जाति दमनया अवस्थाय् थ्यंगु खः धयादिल ।

ख्वपया विज्ञ व्यक्तित्व ओमचरण अमात्यं नेवाः समुदाय आर्थिक रुपं सशक्त जूगुया नापनापं राजनीतिक रुपं नं अथे हे सशक्त जुया वने फुसा जक जातीय रुपं वयाच्वंगु ¥हासया अन्त्य याये फइ धयादिल ।

प्रतिष्ठानया दुजः गणेशभक्त शिल्पकारं लसकुस यानादीगु ज्याझ्वलय् सफूयात कयाः अन्तर संवाद नं जूगु खः ।