युरोपय् कोरोनां यानाः ७ लाख मनूत सीफइगु डब्लूएचओया ख्याच्वः

एजेन्सी- विश्व स्वास्थ्य संगठन ( डब्लूएचओं) युरोपय् सन् २०२२ या मार्च तकया दुने कोरोनाया कारणं थप ७ लाख मनूत सीफुगु ख्याच्वः बिउगु दु । विश्व स्वास्थ्य संगठनं युरोप व एसियाया छुं देय् यानाः ४९ गू देय्या सघन उपचार कक्षया भार उच्च निसें अत्यधिक जुइगु नं धाःगु दु ।

विश्व स्वास्थ्य संगठनया निर्देशक डा. हान्स क्लुगें अनावश्यक त्रास पनेत व कोरोना सीगुपाखें बचे यायेत कोरोनाया खोप कायेत इनाप याःगु दु । युरोपय् कोरोनाया कारणं तयातःगु लकडाउन व थीथी नियमया विरोध यासें जुयाच्वंगु प्रदर्शनया इलय् विश्व स्वास्थ्य संगठनं थज्याःगु ख्याच्वः बिउगु खः ।

युरोपया नेदरल्याण्ड्स, अस्ट्रिया, क्रोएसिया व इटालीइ लकडाउन व कोरोनाया नियम विरुद्ध प्रदर्शन जुयाच्वंगु दु । कोरोना संक्रमण पनेगु निंतिं फ्रान्स, जर्मनी व ग्रीसं बुस्टर डोज अनिवार्य यायेधुंकूगु दु ।