न्हय्गू भासं संविधान दिवसया भिंतुना

येँ – प्रधानमन्त्री केपी ओलीं नेपालभाषा लिसें न्हय्गू राष्ट्र भासं संविधान दिवसया भिंतुना बियादीगु दु । प्रधानमन्त्री ओलीं सामाजिक सञ्जाल मार्फत खस नेपाली भासं पूवंक भिंतुना सन्देश बिउगुु खःसा मेगु खुगू भासं भिंतुना सन्देशया मू भाव व छुं अंश दुथ्याकाः तयादीगु खः ।

भिंतुना सन्देशय् फुक्कं पेशा, क्षेत्र, लिंग, समुदाय व फुक्क राजनीतिक दलया नेता व देशवासीत आन्दोलनया चरण क्वचाःगुलिं देय्या विकास व समृद्धिया अभियानय् सहयोगी भावना ज्वनाः न्ह्याः वनेत आह्वान यानातःगु दु । वय्कलं नेपालभाषा, तामाङ, अंग्रेजी, भोजपुरी, मैथिली, खाम मगर भासं भिंतुना सन्देश बियादीगु खः ।

प्रधानमन्त्रीया प्रेस सल्लाहकार कुन्दन अर्यालं बहुभाषिक नेपाःया भाषाभाषीतय् उत्थान व प्रोत्साहनया निंतिं न्हूगु परम्परा न्ह्याकेत थुकथं थीथी भासं सन्देश बिउगु खँ कनादीगु दु ।