मालिकं ब्वः बिल धकाः कायम्ह अपहरण यानाः हत्या

येँ – थनया ग्वंगःबुँइ अपहरण जूम्ह च्यादँ दुम्ह छम्ह मचायात स्यानातःगु अवस्थाय् लुइकूगु दु । निन्हु न्ह्यः बेपत्ता जूम्ह प्रयास कुँवरयात अपहरण लिपा स्यानातःगु अवस्थाय् म्हिगः लुइकूगु खः । मचायात अपहरण यानाः स्याःम्ह अभियुक्त महेन्द्र सार्की मचाया अबु प्रवीण कुँवरं सञ्चालन यानाच्वंगु स्वस्तिका त्रिवेणी होटलया गाडी चालक खः ।

सार्कीं मचाया मांअबुपिं नियमित स्वास्थ्य परीक्षण याः वनाच्वंगु इलय् मचायात चकलेट बियाः अपहरण यानागु बयान प्रहरीयात बिउगु दु ।
सार्कीं बिउगु बयानया आधारय् प्रहरीं म्हिगः मचाया शव म्हय्पिया ताँ क्वं बरामद याःगु खः । मचाया शव छपाः तपाःगु झोलाय् तयाः ताँया क्वय् फोहोर वायेगु थासय् वांछ्वयातःगु खः ।

गेस्ट हाउसं बेपत्ता जूम्ह प्रयासयात मालेत प्रहरीं आपालं जनशक्ति परिचालन याःगु खः । तर लुइके मफयाच्वंगु खःसा म्हिगः म्हय्पिइ झोलाय् दुने तयातःगु अवस्थाय् प्रयासया सीम्ह लूगु खः । शवयात पोष्टमार्टमया निंतिं यंकूगु दु ।प्रहरीया कथं मचा अपहरण लिपा सार्कीं फिरौटी वा मेगु छुं नं कथंया माग धाःसा याःगु मदु ।

होटल मालिक प्रवीणं थःत न्ह्याबलें ब्वः जक बीगु व जागिरं लिकायेगु धकाः धम्की बिउगुलिं तंया झोंकय् अपहरण यानागु खँ सार्कीं धाःगु दु । हत्या जूम्ह मचा प्रयास टाउन प्लानिङया वेलमेन्ट इन्टरनेशनल स्कुलय् १ कक्षाय् ब्वनाच्वंम्ह खः ।