समाजवादी व राजपाया पाखें संविधान संशोधन विधेयक दर्ता

येँ – समाजवादी पार्टी नेपाल व राष्ट्रिय जनता पार्टी नेपालं संविधान संशोधनया निंतिं गैरसरकारी विधेयक दर्ता याःगु दु । निगूलिं पार्टीं सोमवाः मंकाः कथं २३ बुँदे संशोधन प्रस्ताव सहितया गैरसरकारी विधयेक दर्ता याकूगु खः । समाजवादीया सहअध्यक्ष राजेन्द्र श्रेष्ठ व राजपाया नेता लक्षमणलाल कर्णं विधेयक दर्ता यानादीगु खः । संसद सचिवालय दर्ता जूगु थुगु विधेयकया दर्ता नम्बर १ खः ।

बहुभाषिक नीति, बैवाहिक नागरिकता, जनसंख्याया आधारय् राष्ट्रिय सभाय् प्रतिनिधित्व, प्रदेशया सीमांकन, विशेष संरचनायात निंतिं संघीय आयोग दयेकेगु, प्रदेशया क्षेत्राधिकार, अवशिष्ट अधिकार, समानुपातिक समावेशीकरण, संघीय न्यायपालिका, संवैधानिक अदालत, भ्रष्टाचार नियन्त्रण्या निंतिं लोकपालया व्यवस्था लगायतया विषय दुथ्याका संशोधन विधेयक दर्ता याःगु खः ।

संवैधानिक व्यवस्था कथं विधेयक न्हय्न्हुया दुने सहलह यायेगु निंतिं योग्य जुइ । वयां लिपा विधेयकयात न्ह्याकेगु निंतिं नेपाल सरकारया अनुमतिया निंतिं कानून, न्याय व संसदीय व्यवस्था मन्त्रालयलय् वनी । अनं अनुमति दयेधुंकाः विधेयक प्रतिनिधिसभाया कार्यव्यवस्था समितिइ सहलह जुइ व वयांलिपा उकीया सिफारिसय् सभामुखं संसदय् पेश याइगु व्यवस्था दु ।