दृढनिश्चयं सगरमाथा च्वकाय् थ्यंम्ह पूर्णिमा

येँ – शनिवाः सुथय् ८ः१० बजे पाखे सगरमाथाया च्वकाय् पलाः तयेवं पूर्णिमा श्रेष्ठ सगरमाथा च्वकाये थ्यंम्ह न्हापां फोटो पत्रकार जक मखु, सगरमाथाया सफल आरोहण याःम्ह स्वम्ह नेवाः मिसा नं जूगु दु । नीन्हय्दँ न्ह्यः गोरखाया आरुघाटय् बूम्ह पूर्णिमां फोटो पत्रकारया रुपय् सगरमाथा गयेत वंम्ह खः । अथे खःसां पूर्णिमा सगरमाथा च्वकाये थ्यंम्ह स्वम्ह नेवाः मिसाया रुपय् नं नां तयेत ताःलाःगु दु । थ्वयां न्ह्यः येँ झोछेँया मोनी मुलेपति दकलय् न्हापां सगरमाथा सफल आरोहण याःम्ह नेवाः मिसाया कीर्तिमान तःगु खः । मोनी धुंकाः येँया हे सुष्मिता मास्कें सगरमाथाया सफल आरोहण याःगु खः ।

न्यादँ न्ह्यवनिसें फोटोग्राफी यानाच्वंम्ह पूर्णिमायात थगुने जूगु टेन्जिङ हिलारी एभरेस्ट म्याराथुनया किपा कायेत सगरमाथाया मुलय् लानाच्वंगु खुम्बुइ थ्यंबलय् सगरमाथा गयेगु बिचाः वःगु जुयाच्वन । हाइअल्टिच्युडया एभरेस्ट टे«लय् दँय्दसं जुइगु म्याराथुनया समाचार कभर यायेत वंम्ह पूर्णिमां छन्हु जि नं सगरमाथा गये धयागु निश्चय यानावःगु जुयाच्वन ।

‘जि लिहां वयेधुंकाः छन्हु जिं नं सगरमाथा गये धकाः पासापिंत कनेबलय् दक्वं न्हिलीगु’ सगरमाथा बेसक्याम्पं सगरमाथा गःवने न्ह्यः बिबिसीलिसे खँ ल्हासें पूर्णिमां धाल, ‘बेसक्याम्प तक वनावयेवं सगरमाथा गयेफइगु जूसा जिपिं नं दक्वं सगरमाथा आरोही जुइधुंकीगु नि धकाः पासापिंसं हायेकीगु ।’

तर पूर्णिमां थःगु सगरमाथा गयेगु इच्छायात दृढनिश्चयय् हिल, अले हिमाल आरोहणया प्रशिक्षण कायेगु सुरु यात । थ्व झ्वलय् वं निलाया प्रशिक्षण लिपा हे दकलय् तजाःगु च्वापुगुँया धलखय् लाःगु ८१६३ मिटरया मनास्लु हिमालया सफल आरोहण यात । वया प्रशिक्षकपिंसं उबलय् नं वयात ६००० मिटर स्वयां क्वय्या हिमालपाखें सुरु याःसा जिउगु सुझाव बिउगु खः, तर पूर्णिमां थःगु छेँया च्वय् लाःगु मनास्लु हिमाल हे ल्यल, अले २६ सेप्टेम्बर २०१७ य् सफल आरोहण यात ।

सगरमाथा च्वकाये वने न्ह्यः पूर्णिमां बेसक्याम्पय् थःम्हं कयातयागु किपाया ब्वज्या नं याःगु खः । ‘नेपाली मिस्तय् न्हिला’ नामं पिजे क्लबया प्राविधिक ग्वाहालिइ नेपाल पर्यटन बोर्डया फोटो नेपाल अभियान अन्तर्गत याकः किपा ब्वज्या याःगु खः ।