नेपालया विजयी सुरुवात

येँ (नेपालभाषा टाइम्स) – थनिंनिसें येँया दशरथ रंगशालाय् सुरु जूगु खुक्वःगु मिस्तय् साफ च्याम्पियनशीप फुटबलय् नेपालं विजयी सुरुवात याःगु दु । थौं जूगु उलेज्या कासाय् नेपालं भूटानयात ४–० गोलं बुकूगु खः । नेपाःया निंतिं सावित्रा भण्डारीं निगू व अनिता बस्नेतं निगू गोल याःगु खः ।

कासाया १२ औं मिनेटय् भण्डारीं गोल यासें नेपाःयात अग्रता बिउगु खः । साम्बा नामं म्हसिउम्ह भण्डारीया थ्व गोल राष्टिय टिमया निंतिं स्वदँ लिपा याःगु गोल खः । तुतिया चोटया कारणं भण्डारी स्वदँ न्ह्यवनिसें मैदानं पिने लानाच्वंगु खः ।

तसकं वा वया प्रभावित जूगु कासाय् न्हापांगु हाफय् नेपालं मेगु गोल यायेमफुतसा निगूगु हाफय् भण्डारीं थप छगू व बस्नेत निगू गोल याःगु खः ।
थौंया कासां अमिसा कार्की, दीप शाही व समिक्ष कार्कीं नेपाःया राष्टिय टिमय् डेब्यु याःगु खः ।