मनाङ व संकटा त्यात

येँ – शहीद स्मारक लिगय् मनाङ मस्र्याङ्दीं थःगु शीर्षस्थानयात कायम हे यानातःगु दु । शनिवाः जूगु कासाय् सरस्वती युवा क्लबयात २–० गोलं बुकुसें मनाङं ल्याः धखलय् ३ अंकया अग्रतासहित शीर्षस्थान कायम हे याःगु खः । शनिवाः जूगु कासाय् मनाङया निंतिं अन्जन विस्ट व ओलाव आफिजं छगू छगू गोल याःगु खः । न्हापांगु हाफय् छगू नं गोल मजुइवं लिपांगु हाफ सुरु जूगु झिगू मिनेट लिपा अञ्जनं मनाङयात अग्रता बिउगु खः । अथेहे ओलावां ७८ औं मिनेटय् थप छगू गोल यासें विजय सुनिश्चित यानाबिउगु खः ।

थुगु सीजनय् म्हितेधुंकूगु न्यागुलिं कासा त्याकाः मनाङ १५ अंक सहित शीर्षस्थानय् दुगु खः । मनाङया लिउलिउ १२–१२ अंक कयाः थ्रीस्टार व संकटा क्लब दु । संकटां म्हिगः हे जूगु मेगु कासाय् च्यासल युथ क्लबयात बुकूगु खः । हल्चोकय् जूगु कासाय् च्यासलयात २–१ गोलं बुकुसें संकटां ३ ल्याः थःगु ल्हातय् लाकुगु खः । कासाया २३ औं मिनेटय् पेनाल्टिपाखें संकटां अग्रता काःगु खः । संकटाया सेड्रिक अबां बिउगु पासयात च्यासलया छिरिङ गुरुङं बक्स दुने हे ल्हातं पनेवं पेनाल्टिया ह्वःताू चूलाःगु खः, गुकियात अमित तामाङं याउँक गोल यासें अग्रता बिउगु खः । कासाया ४८ औं मिनेटय् संकटाया निंतिं एलोन म्याक्सेवलं थप छगू गोल याःगु खः ।

कासाया ८७ औं मिनेटय् च्यासलं पेनाल्टिपाखें हे गोल यासें कासाय् २–१या स्थितिइ हःगु खः । सन्तोष साहुखलःयात डिबक्स दुने क्वःदयेकेवं च्यासलयात पेनाल्टि वःगु खःसा उकियात सन्तोषं हे गोल याःगु खः । थ्व कासाय् नं बुइवं च्यासल ४ अंकय् हे सीमित जूगु दु । च्यासलं म्हितूगु न्यागू कासा मध्ये स्वंगुलिइ पराजित जूगु दुसा छगू त्याःगु व छगू बराबरीइ म्हितूगु खः । थ्व कासाय् संकटाया नितिन थापा म्याद अफ दि म्याच घोषि तजूगु खः ।

सम्बन्धित बुखँ

LEAVE YOUR COMMENTS