शीतला मा.वि.इ शैक्षिक सामग्री इन

येँ (नेपालभाषा टाइम्स)- हिमालय मित्र ई.वि. जर्मनीया आर्थिक ग्वाहालिइ वंगु शनिवाः येँ मनपा १६ वडाया शितला माध्यमिक विद्यालयया ७५ म्ह गरिब व आवश्यकता दुपिं विद्यार्थीपिंत स्कुल युनिफर्म व स्टेशनरी ज्वलं इनेगु ज्या जूगु दु । येँं मनपा वडा नं. १६या वडा सदस्य व विद्यालय व्यवस्थापन समितिया अध्यक्ष शारदा सुवेदीया सभापतित्वय् जूगु ज्याझ्वलय् हिमालय मित्रया अध्यक्ष मार्गिट इगम्यानं छ्वयाहःगु सामग्री नेपाःया प्रतिनिधि प्रसन्नराज रेग्मीं वितरण यानादीगु खः ।

ज्याझ्वलय् विद्यालयया प्रधानाध्यापक लक्ष्मण श्रेष्ठं ग्वाहालि यानादीपिंत सुभाय् देछासें वइगु दँय् नं गरिव व जेहेन्दार विद्यार्थीपिंत नियमित रुपं थुकथं सामग्री वितरण यायेगु खँ धयादिल । हिमालय मित्र ई.वि. जर्मनीलिसेया सहकार्यया निंतिं यानादीगु कुतःया निंतिं वय्कलं प्राथमिक तहया इन्चार्ज देवकुमारी शर्मायात सुभाय् देछायादिल ।

ज्याझ्वलय् उपस्थित स्थानीय अभिभावक अर्जुन नेपालीं विद्यालयं थीथी अतिरिक्त क्रियाकलाप यायेगु झ्वलय् शिक्षाय् शीप, बुक फ्री डे लिसें गरिब विद्यार्थीपिंत ग्वाहालि यायेगु ज्या याना वयाच्वंगुलिं विद्यालयया नां न्यनावनाच्वंगु खँ कनादिल । वय्कलं शैक्षिक प्रगतिया नापनापं पारदर्शी ढंगं ज्या यानाः विद्यालयं अभिभावकतय् नुगः त्याकूगु खँ धयादिल ।

ज्याझ्वलय् विद्यालय व्यवस्थापन समिति, शिक्षक अभिभावक संघ, शिक्षण कर्मचारी, विद्यार्थी व अभिभावकपिंसं ब्वति काःगु खः ।