येँय् उच्च क्षमताया प्रशारण लाइन दयेकीगु
येँ – स्वनिगलय् मतया आपूर्ति प्रणालीइ सुधार हयेगु निंतिं दीर्घकालिन लक्ष्य सहित नेपाल विद्युत प्राधिकरणं उच्च क्षमताया प्रणाली दयेकीगु जूगु दु । थज्याःगु प्रसारण प्रणालीयात स्वनिगःया प्रणारण ‘रिङ्ग’ नां बिउगु दु । भविष्यय् जुइगु विद्युतया मागयात व्यवस्थापन यायेगु निंतिं थ्व रिङ्ग दुने येँ, यल, व ख्वप जिल्ला स्वाइगु कथं २२० केभी डबल सर्किट प्रसारण लाइन दयेकेत्यंगु खः ।
थौंकन्हय् स्वनिगलय् १३२–६६ व ६६–११ केभीया प्रसारण लाइनमार्फत मत आपूर्ति याना वयाच्वंगु खः । काठमाडौं उपत्यका विकास प्राधिकरणं दयेकीगु बाहिरि चक्रपथ लिक्कसं थ्व प्रसारण लाइन निर्माण यायेगु खँ प्राधिकरणं धाःगु दु । आउटर रिङ्गरोड लिक्कसं दयेकीगु थ्व प्रसारण लाइनया लम्बाइ ७५ किलोमिटर दुसा थुकिया अनुगमानित लागत १५ करोड डलर तुइगु खँ धाःगु दु ।
प्राधिकरणया निर्देशक कुलमान घिसिङ्गं दछि निदँ लिपा हे स्वनिगःया मतया मागयात आः दुगु संरचनां ठेगे याये मफइगुलिं न्हूगु प्रसारण लाइन दयेकेत्यनागु खँ धयादीगु दु । थौंकन्हय् स्वनिगलय् लोडसेडिङ्गं मुक्त जुइवं मतया माग नं तसकं अप्वया वयाच्वगु दु ।थौंकन्हय्या प्रसारण व वितरण लाइन क्षमता तसकं कमजोर व जीर्ण जूगुलिं विद्युत ट्रिपिङ्ग जुइगु, ट्रान्सफर्मर च्याइगु समस्या वयाच्वंगु खँ धाःगु दु ।
दोलखा् दयेकाच्वंगु ४५६ मेगावाटया माथिल्लो तामाकोसीलिसें उगु क्षेत्रय् निजी ख्यलय् दयेकाच्वंगु जलविद्युत आयोजनाया मत म्येँ हयेगु निंतिं प्राधिकरणं खिम्ती ब्राहबिसे ४००–२२० केभी प्रसारण लाइन व लप्सीफेदीइ २२०–१३२ केभी व ख्वपया चाँगुनारायणय् १३२–११ केभीया सबस्टेशन दयेकेत्यनागु खँ नं प्राधिकरणं धाःगु दु ।
स्वनिगलय् विद्युत आपूर्तिइ सुधारया निंतिं महत्वपूर्ण कथं कयातःगु थानकोट–चापागाउ–ख्वप १३२ केभीया प्रसारण लाइन आयोजना वंगु नीदँ न्ह्यवनिसें अलपत्रय् लानाच्वगु दु ।
थ्व आयोजनायात येँ व ख्वपय् च्वंगु ब्वः दयेके सिधयेधुंकूगु दुसा मुआब्जाया खँय् चापागाउँवासीत लिसे खँ मिले मजूगुलिं थ्व ब्वय् धाःसा आयोजना न्ह्याः वनीगु छुं संकेत खने मदयाच्वंगु खँ स्थानीयतय्सं धाःगु दु । न्हूगु प्रसारण प्रणाली दयेकेधुंकाः स्वनिगलय् माग याःगु स्वयां अप्वः मत उपलब्ध जुइगु खँ प्राधिकरणं धाःगु दु ।
LEAVE YOUR COMMENTS