ट्याक्सीइ यात्रु मदयाः चालक हैरान

येँ (नेपालभाषा टाइम्स) – सरकारं सार्वजनिक यातायात खुल्ला याःसां नं यात्रुतय् धाःसा अभाव जुयाच्वंगु दु। सरकारं शुक्रवाः निसें चिधंगु रुटया बस, माइक्रोबस, ट्याम्पु लिसें ट्याक्सी चले याकेबीगु धाःगु खः । बस, माइक्रो बस, ट्याम्पु धाःसा सरकारं घोषणा याःसां चले मजूनिसां ट्याक्सी धाःसा आपालं ग्यारेजं पितहयेगु सुरु जूगु खः ।

ट्याक्सी चालकतय्सं ग्यारेजय् थानाच्वंगु ट्याक्सी पितहःसां यात्रु मदयाः धाःसा चालकत हैरान जुयाच्वंगु दु। यात्रु मदयाः हैरान जुयाच्वंपिं ट्याक्सी चालकतय्सं आः गाडी चले यायेगु स्वयां मेगु हे विकल्प माले मालिगु अवस्था वःगु खँ धाःगु दु। छम्ह चालकं ‘नेपालभाषा टाइम्स’ लिसे खँ ल्हायेगु झ्वलय् धाल, ‘टिप हे मदु, थौं न्हिछि गाडी चले यानाः स्वसः दां कमे जूगु दु। थ्व दामं पेट्रोल तयेगु कि, साउयात बीगु कि, थःत तयेगु ?’

उम्ह चालकं धाःगु दु, ‘छन्हु निन्हु गाडी चले यानाः स्वये, यदि अवस्था थथे हे जुयाच्वन धाःसा गाडी त्वःताः ज्यामि ज्या याःवनेगु तयारी यानाच्वनागु दु।’

ट्याक्सी चले जूसां थौंकन्हय् ट्याक्सी गइपिं धाःसा मदु। उकिसनं छगः ट्याक्सीइ निम्ह जक च्वनेमाःगु नियमं यानाः परिवार दुपिं मनूत ट्याक्सीइ च्वनेगु स्वयां प्राइभेट गाडी च्वनेगु यानाच्वंगु दु ।

स्थानीय वासिन्दा राकेश शाहीया कथं प्राइभेट गाडीइ न्ह्याक्वः मनूतःसां नं ट्राफिक प्रहरीं चिउताः मतः, तर ट्याक्सीइ निम्ह स्वयां अप्वः तल कि हे ट्राफिकं पंवइगु। अथे जूगुलिं थम्हं नं पासाया प्राइभेट कार कयाः सेवा बियाच्वनागु खँ वय्कलं कनादिल । वय्कःया कथं नं आपालं ट्याक्सी चालकतय्सं पेसेन्जर मदुगुलिं थःगु पेशा हे हिलेगु मनस्थिति दयेकाच्वंगु दु ।

बस, माइक्रोबस व्यवसायीतय्सं धाःसा सरकारं सार्वजनिक यातायात सञ्चालन यायेगु छुट बिउसां सार्वजनिक यातायात सञ्चालन यायेमफइगु खँ धाःगु दु। सरकारं हःगु नियमं कथं गाडी चले यायेबलय् थःपिंत घाटा जुइगु धासें सरकारया नियम कथं सञ्चालन यायेगु खःसा सरकारं अनुदान बीमाःगु माग उमिगु दु ।

नेपाल यातायात व्यवसायी राष्ट्रिय महासंघं सरकारं थःपिनिगु माग सम्बोधन मयाःतले व्यवसाय सञ्चालन याये मफइगु खँ धाःगु दु। महासंघया उपाध्यक्ष ऐनकुमार शाहीं ‘नेपालभाषा टाइम्स’ लिसे खँ ल्हायेगु झ्वलय् सरकारं गाडी चले या धाःसां तत्काल गाडी चले यायेफइगु अवस्था मदु धयादीगु दु ।

वय्कःया कथं स्वला न्ह्यवंनिसें ग्यारेजय् लानाच्वंगु गाडी चले यायेगु निंतिं दकलय् न्हापां दयेकेगु ज्या यायेमानि, उकिया निंतिं म्होति नं छगः गाडीइ निगू निसें स्वंगू लाख तका खर्च जुइगु अवस्था दु। गाडी चले यायेगु खःसा उकिया निंतिं सरकारं पुर्नकर्जा बीमाःगु खँ वय्कलं धयादीगु दु ।

वय्कलं थःपिंसं सरकारयाके ‘लकडाउन’ ईया ब्याज मिनाह यायेमाःगु व पुलेमाःगु किस्ता लिछ्यायेमाःगु माग यानागु खःसां नं सरकारं थःपिनिगु मागयात गम्भीर रुपं मकाःगु द्वपं नं बियादीगु दु। थःपिंसं छुं न्हि न्ह्यः किस्ता पुलेत ताकेता याःगु बैंकयात गाडीया ताःचाः हे लःल्हानागु जानकारी नं वय्कलं बियादिल ।

गाडीया ताःचाः लःल्हायेगु झ्वलय् बैंकया प्रतिक्रिया छु दु धकाः न्यनागु न्ह्यसलय् वय्कलं धयादिल, ‘बैंकया कर्मचारीतय्सं सरकार व अर्थमन्त्री माने जुल धाःसा थःपिं किस्ता लिछ्यायेत व पुर्नकर्जा बीत नं तयार दु धकाः धाःगु दु।’