प्राधिकरण स्मार्ट मिटर रिडिङ हल
येँ – नेपाल विद्युत प्राधिकरणं ग्राहकया छेँ छेँय् मवँसें प्रविधि मिटर रिडिङ यायेगु प्रविधि छ्यलीगु जूगु दु । थुकिया निंतिं प्राधिकरणं एडभान्स मिटरिङ इन्फ्रास्टक्चर नेपालय् दुत हःगु दु । उगु प्रविधि कथं मतया ग्राहकया छेँय् दुगु मिटरय् छगू कथंया मोडियन जडान यायेधुंकाः प्राधिकरणया ज्याकुथिं हे गुम्ह ग्राहकं गुलि मत च्याका च्वन व उकिया बापत गुलि ध्यबा पुलेमाः धइगु खँ सीके फइगु खँ धाःगु दु ।
उगु प्रणालीया शुभारम्भ मंगलवाः प्राधिकरणया कार्यकारी निर्देशक कुलमान घिसिङ यानादीगु दु । प्राधिकरणया कथं अज्याःगु प्रणाली न्हापांगु चरणय् रत्नपार्क वितरण केन्द्रं शुरु यायेगु खँ धाःगु दु । उगु प्रणाली रत्नपार्क वितरण केन्द्र दुगु ग्राहकया छेँय् वा ज्याकुथिइ जडान याइगु जूगु दु ।
प्राधिकरणं इन्टरनेट सञ्जालपाखें अःपुक ग्राहकया बारे जानकारी काये फइगु जक मखुसे मिटर बन्द यायेगु व चायेकेगु व्यवस्था नं उगु प्रविधिं यानातःगु दु । लिपांगु इलय् स्मार्ट मिटरया अवधारण न्ह्यःने हःगु प्राधिकरणं उगु हे आज्जु कार्यान्वयन यायेगु ज्या न्ह्याकूगु खः । प्रविधिं ग्राहक व प्राधिकरणया कर्मचारीयात नं ज्या यायेत अपुइगु खँ धाःगु दु ।
प्राधिकरणया कथं औद्योगिक ग्राहकयात न्हापांगु प्राथमिकता बियाः आधुनिक मिटर जडान यायेगु तयारी जुयाच्वंगु दु । वयां लिपा जक छेँय्या निंतिं प्रविधि जडान यायेगु तयारी प्राधिकरणं यानाच्वंगु दु । न्हूगु प्रविधि छ्यलाबुलाय् वयेधुंकाः मत चुहावत व मत खुया काइगु ज्या नं नियन्त्रण यायेत ग्वाहालि जुइगु विश्वास प्राधिकरणया दु ।
LEAVE YOUR COMMENTS