ने. सं. ११४४ कौलाथ्व तृतीया -

बार्सिलोना तःधंगु अन्तरं त्यात

स्पेनिस ला लिगाय् बार्सिलोनां नवप्रवेशी हुएस्कायात तःधंगु अन्तरं बुकूगु दु । म्हिगः चान्हय् जूगु कासाय् बार्सिलोनां हुएस्कायात ८–२ गोलं बुकूगु खः । बार्सिलोनाया निंतिं कप्तान लियोनल मेसी व लुइस स्वारेजं निगू निगू गोल याःगु खःसा उसमान डम्बले, इभान राकिटिक व जोर्डी अल्बा छगू छगू गोल याःगु खः ।

हुएस्काया जोर्गे पुलिडों छगू आत्मघाती गोल याःगु खः । हुयस्कापाखें हर्नान्डेज व एलेक्स गाल्लरं गोल याःगु खः ।कासाय् दकलय् न्हापां हुएस्कां हे अग्रता काःगु खः । कासाया स्वगंू मिनेटय् हर्नान्डेजं गोल यानाः हुएस्कायात अग्रता बिउगु खःसा १६ औं मिनेटय् कप्तान लियोनल मेसी बराबरी गोल याःगु खः ।

हुएस्काया जोर्गे पुुुलिडों २४औं मिनेटय् आत्मघाती गोल यायेवं बार्सिलोना २–१ गोलं अग्रता काःगु खः । लुइस स्वारेजं ३९ औं मिनेटय् गोल यानाः बार्सिलोनायात ३–१ गोलं अग्रता बिउगु खः । कासाया ४२औं मिनेटय् हुएस्काया निंतिं एलेक्सं गोल यासे गोलअन्तर म्हो याःगु खः ।
न्हापागुं हाफय् बार्सिलोनां ३–२ गोलं अग्रता काःगु खःसा निगूगु हाफ थप न्यागू गोल यात ।

निगूगु हाफया ४८ मिनेटय् डेम्बले व ५२ मिनेटय् राकिटिकं छगू छगू गोल याःगु खःसा ६१ औैं मिनेटय् मेसीं व्यक्तिगत निगूगु गोल याःगु खः । अथेहे जोर्डी आल्बां कासाया ८१ औं मिनेटय् गोल याःगु खःसा ९० औं मिनेटय् स्वारेजं पेनाल्टी गोल याःगु खः । कप्तान मेसीयात ह्याट्रिक यायेगु ह्वःताः वःगु खःसा मेसीं स्वारेजयात पेनाल्टी थ्वायेगु अवसर बिउगु खः ।