न्हूगु प्रविधि स्याउ खेती

येँ –  नेपालय् माग कथं स्याउ उत्पादन जुइ मफयाच्वंगु दु । गुकिं यानाः विदेशं स्याउ आयात अप्वया वनाच्वंगु दु । थ्वहे झ्वलय् नेपालय् स्याउ उत्पादन अप्वयेकेगु ताः तयाः मनाङय् हाइ डेन्सिटी एप्पल फर्मं न्हूगु प्रविधिं स्याउ उत्पादन सुरु याःगु दु । थौंकन्हय् थ्व फर्मया ज्यामित स्याउ माः सुसाःकुसाः यायेगु ज्याय् व्यस्त जुयाच्वंगु दु ।

मनाङया नेस्याङ गाउँपालिका १, भ्राताङय् ७५० रोपनी जग्गा न्हू प्रविधिं स्याउ खेती यानाच्वंगु दु । थन फर्मय् इटली व सर्बियां फुजी, गाला व गोल्डेन जातया स्याउ माः हयाः पिनातःगु दु । थ्व स्याउमाः बांलाक स्याहार यायेफत धाःसा छमा स्याउमां हे ४० निसें ४५ किलो स्याउ बिइगु खँ धाःगु दु ।

थन फर्मय् स्याहार यानाच्वंम्ह ज्यामि राजु तामाङं राससलिसे खँ ल्हासें धाल, ‘उत्पादन अप्वयेकेत स्याउमाय् स्केल कटिङ्ग याना वयाच्वनागु दु ।’माथिल्लो मनाङया टङ्कीमनाङ, खाङसार, ङावल, पिसाङ, घ्यारु व भ्राकाया स्थानीय वासिन्दातय्सं ७३५ रोपनी जग्गा बालं कयाः स्याउ खेती याना वयाच्वंगु खः । थन भदौया अन्तपाखे निसें स्याउ खायेगु सुरु जुइ ।

एग्रो मनाङं वंगु दँय् स्वसः टन स्याउ उत्पादन यानाः स्वंगू करोड हे कमे याःगु खः । थ्व दँय् न्यासः टन स्याउ उत्पादन यायेगु लक्ष्य तयातःगु दु । स्याउ फर्मय् थांैकन्हय् ५० म्ह ज्यामित ज्या यानाच्वंगु दु । २५ करोड तका लागतय् २७ दँया निंतिं जग्गा बालं कयाः थन स्वताजि जातया स्याउ पिउगु खः ।

स्याउ खेतीया लिसें पिसाङय् हे जुस उद्योग व भण्डार गृह नं दयेकागु खँ कम्पनीया प्रबन्धक सोमराज गुरुङं धयादीगु दु । ‘दँय्दसं स्याउ उत्पादन अप्वया वनाच्वंगु दु । छमा सिमां ४५ किलो तक स्याउ उत्पादन जुयाच्वंगु दु’ वय्कलं कनादिल । थनया स्याउ पोखरा निसें येँय् तक मिइगु जुयाच्वंगु दु ।

सम्बन्धित बुखँ

LEAVE YOUR COMMENTS