नेवाः लगानी च्वन्ह्याकेत इन्भेष्टमेन्ट कम्पनी

येँ – नेवाः अर्थतन्त्र क्वातुकेगु ताः तयाः ह्याउँनिभाःपाखें म्हिगःनिसें आज्जु भैरव इन्भेष्टमेन्ट कम्पनी सञ्चालनय् हःगु दु । अनुप सिं सुवालया अध्यक्षताय् नीस्वंगु उगु इन्भेष्टमेन्ट कम्पनीं नेवाः लगानी व नेवाः उत्पादनया लागिं बजाः मालेगु ज्या याइगु खँ धाःगु दु ।
ह्याउँनिभाःपाखें म्हिगः न्हूदँ ११३९ या लसताय् याःगु छगू ज्याझ्वःया दथुइ उकिया उलेज्या जूगु खः । पुलांम्ह मन्त्री राजेन्द्र श्रेष्ठ, अर्थविद् डा. दुर्गालाल श्रेष्ठ व नेपाः पार्टीया अध्यक्ष डा. विजय सैंजुं मंकाः रुपं उकिया आरम्भ यानादीगु खः । वय्कःपिंसं न्हूगु आर्थिक अभियानयात भिंतुना नं बियादिल ।

थुकिया नापं ह्याउँनिभाःपाखें म्हिगः हे ल्याय्म्हपिं नेवाःतय्सं तयार याःगु वाणिज्य व्यापार सम्बन्धी न्हूगु बिचाःयात कार्यान्वयन याना यंकेगु लागिं ‘आइडिया नेपाल’ नांगु संस्था नं सञ्चालनय् हःगु दु । नापं नेवाः आन्दोलनय् क्वातुगु नेतृत्व निर्माण याना वनेगु लागिं ‘ह्याउँनिभाःया अभियान, सवल नेतृत्व निर्माण’ नामं अभियान न्ह्याकेगु नं निर्णय याःगु दु ।

लिसें प्रचार प्रसार ज्यायात न्ह्यःने यंकेगु लागिं ‘च्यानल एस’ नांगु टिभी च्यानल नं सुरु याःगु दु । म्हिगः हे ह्याउँनिभाः संस्थाया न्हूधाः यायेगु ज्या नं जुल । धनबहादुर महर्जनया नेतृत्वय् संस्थाया न्हूधाः याःगु दुसा उकी दुजः कथं दयाचन्द्र श्रेष्ठ, अंजिता रंजित, सानुमैयाँ महर्जन, धिरेन्द्र राजभण्डारी, रविन्द्रमान महर्जन व सोहनलाल प्रधान च्वनादीगु दु ।