बिम्स्टेक सम्मेलनय् बुद्ध जन्मभूमि व बौद्ध दर्शनया महत्वय् जोड

येँ – नेपालय् निन्हुयंकं जूगु बिम्स्टेकया प्यक्वःगु शिखर सम्मेलनय् बुद्ध जन्मभूमि व बौद्ध दर्शनया महत्वयात नं बः बिउगु दु । सम्मेलनया उलेज्या यासें आयोजक राष्ट्रया ल्याखं प्रधानमन्त्री केपी शर्मा ओलीं थःगु लसकुस न्वचु बियादीगु इलय् बिम्स्टेकया सदस्य राष्ट्रया राष्ट्र प्रमुख व सरकार प्रमुखयात ‘बुद्धया देशय् लसकुस यानाच्वना’ धयादीगु खः ।

सम्मेलनयात संबोधन यायेगु भारतया प्रधानमन्त्री नरेन्द्र मोदीं बिम्स्टेकया सदस्य राष्ट्रया दथुइ अन्तर्राष्ट्रिय बौद्ध सम्मेलन यायेगु जानकारी बियादिल । सन् २०२० तकया दुने बिम्स्टेकया सदस्य राष्ट्र दथुइ अन्तर्राष्ट्रिय बौद्ध सम्मेलन यायेगु जानकारी बियाः बुद्धया महत्वयात कयाः बः बियादिसें भारतीय प्रम मोदीं नालान्दा विश्वविद्यालययात बिम्स्टेकया राष्ट्र भाषा, संस्कृति अध्ययन केन्द्रया रुपय् विकास यायेगु प्रतिवद्धता नं प्वंकादिल ।

अथे हे म्यान्माया राष्ट्रपति सम्मेलनय् ब्वति कायेत नेपाः थ्यंकः वःगु हे न्हिकुन्हु बुद्ध जन्मस्थल लुम्बिनी वनाः पुजा व दर्शन यानादीगु खःसा थुकिं नं लुम्बिनीया नापं बौद्ध दर्शनया महत्वयात अप्वयेकेगु नापं नेपाःया धार्मिक व पर्यटकीय महत्वय् अभिवृद्धि जूगु धाःगु दु ।

थुकथं हे सम्मेनलय् ब्वति कायेत झायादीम्ह श्रीलंकाया राष्ट्रपति मैत्रीपाला सिरिसेनां नं बुद्ध जन्मस्थल लुम्बिनीय भ्रमण यानादीगु खःसा वय्कलं चाबहिलिइ च्वंगु बौद्ध चैत्य अर्थात धन्दो चैत्यया नं दर्शन यानादीगु खः । बिम्स्टेक सम्मेलनय् ब्वति कायेत वयाच्वंगु देय्मध्ये थाइल्याण्डय् ९० म्यान्माय् ८८ व श्रीलंकाय् ७५ प्रतिशत स्वयां अप्वः बौद्ध धर्मावलम्बि दु ।