नेपाःया उडानप्रति जापान व कोरिया सशंकित
येँ – नेपाःया हवाई उडानयात युरोपियन युनियनं ब्ल्याक लिस्टय् लाका तःगु कारणं जापान व दक्षिण कोरिया नं नेपाःया छुं नं विमानयात थःगु देय्या आकासय् ब्वयेकेत सशंकित जुयाच्वंगु दु । नेपाल वायुसेवा निगमं आः नकतिनि हःगु निगः वाइडबडीया विमानपाखें कोरिया व जापानय् नं उडान यायेगु तयारी याःसां थ्व निगुलिं देशं निगमया विमानयात थःगु देशय् ब्वयेकूसां जिउ धकाः स्वीकृति धाःसा मबिउनि ।
सूत्रतय्सं धाः कथं स्वीकृति मबिउगुया कारण धाःसा युरोपं नेपाःया हवाई उडानय् तयातःगु प्रतिबन्ध हे खः । आः नेपाःया हवाई उडान गुलि सुरक्षित जू धकाः बुझे यायेगु लागिं कोरिया व जापानया अलग अलग पुचः नेपाः वयाः सहलह याः वयेत्यंगु दु । उमिसं नेपाः वयाः खँल्हाबल्हा यायेवं नेपाः निगमया जहाजं कोरिया व जापानय् नं याउँक उडान याइगु खँ धाःगु दु ।
निगमं निगः वाइड बडीया जहाज हयेवं याकनं हे कोरिया व जापानया उडान यायेगु धकाः तयारी यानाच्वंगु दु । उकिया लागिं निगमपाखें याये माःगु प्रक्रिया धाःसा फुक्कं सिधयेके धुंकूगु दु । तर नागरिक उड्डयन मन्त्रालयं धाःसा आः तक नं थःपिंसं याये माःगु छुं ज्या मयाःग कारणं निगमयात थाकुयाच्वंगु दु ।
नेपाःया हवाई उडान सुरक्षित जू धकाः नेपाः सरकारपाखें विदेशय् आश्वस्त याना बीमाःगु खःसां आः तक उकिया लागिं छुं पहल धाःसा मजूनि । निगमं निवेदन बियातःगु विश्वया थीथी देशया एअरपोर्टतय्सं छिमिगु विमान गबले हयेगु धकाः निगमयात ताकेता समेत याना हयाच्वंगु दु ।
तर सरकारपाखें स्वीकृतिया लागिं यायेमाःगु ज्या मयाःगु कारणं निगमयाके जहाज दयेधुंकाः नं उडान याये मफयाच्वंगु खँ निगम सूत्रं धाःगु दु । निगमं अन्तर्राष्ट्रिय उडानया लागिं निगः वाइडबडी विमान हःगु खःसा आः निगः न्यारोबडी विमान नं हयेत्यंगु दु ।
LEAVE YOUR COMMENTS