ने. सं. ११४४ कौलाथ्व पारू - नःलास्वनेगु

त्रिचन्द्र सैनिक अस्पताल सेनां नक्सा पास याःगु न्हापांगु भवन

येँ – नेपाली सेनां थनया न्हूसतकस्थित तिंख्यःध्वाखा लिक्क च्वंगु त्रिचन्द्र सैनिक अस्पतालया नक्सा पास याःगु दु । मांकाःद्यःया न्ह्यःनेसं च्वंगु उगु अस्पताल नेपाली सेनां भुखाचं क्षति जुइवं पाःताः जुइक थुनाः न्हूगु दयेकूगु खः । तर न्हूगु दयेकूगु इलय् विना नक्सा पास दयेकूगु धासें यक्वसिनं विरोध यानाहःगु खः ।

यक्वसिनं सेनां छुं नं संरचना निर्माण यायेबलय् स्वीकृति मकासे याःसा जिउला ? धइकथंया न्ह्यसः थना हयेवं सेनां हालय् उगु अस्पतालया नक्सा पास याकूगु खः । येँ महानगरपालिकाया प्रवक्ता ईश्वरमान डंगोलं सेनां ५८ गू लाख तका दां पुलाः अस्पतालया नक्सा पास याकूगु जानकारी बियादीगु दु ।

सरकारी संरचना निर्माण यायेबलय् छुट बीगु प्रावधान दुगु धासें प्रवक्ता डंगोलं सेनां ५८ गू लाख पुलाः नक्सा पास याःगु व थःपिंसं छुं प्रतिशत छ्यापं बियाः बाँकी दुगु शुल्क जक कयागु जानकारी बियादीगु दु । अस्पतालया नक्सा पास जुइवं सेनां दयेकूगु गुगुं नं संरचना नक्सा पास यानाः दयेकूगु थ्व न्हापांगु भवन जूगु दुसा नक्सा पास यायेवं येँ महानगरपालिकां नं सेनायात भवन निर्माण सम्पन्न जूगु प्रमाण पत्र बिउगु खः ।

भुखाय् ब्वयेधुंकाः सेनां पुलांगु अस्पताल थुनाः न्हूगु दनेगु शुरु याःगु खःसा भवन निर्माण लिपांगु चरणय् थ्यनेवं सेनां नक्सा पासया निंतिं येँ महानगरपालिकालिसे सहलह शुरु याःगु खः ।झण्डै गुंगू दशक ताःहाकःगु इतिहास कुबियाच्वंगु त्रिचन्द्र सैनिक अस्पताल न्हापांगु विश्वयुद्ध लिपा बेलायत सरकारं घाःपाः जूपिं सैनिकयात वासः यायेगु निंतिं दयेका बिउगु खः ।

भवन निर्माण प्रक्रिया शुरु जूगु इलंनिसें हे विवादय् लानाच्वंगु खः । पुलांगु जक मखसे पुरातात्विक महत्वया जूगुलिं भवन थुने मजिउ धइगु यक्वसिनं तर्क तया वयाच्वंगु खःसा सछि दँ स्वयां पुलांगु संरचना जूसा जक थुनेत वा पुनःनिर्माण यायेत पुरातत्व विभागया स्वीकृति कायेमाःगु नियम दु । तर सेनां भवन सिफारिस तकं मकासे थुना दनेगु शुरु याःगु खः ।