टर्कीया भुखाय् पीडितयात नेवाः मुस्मांतय् ग्वाहालि

येँ(नेपालभाषा टाइम्स)- टर्कीइ वंगु विनाशकारी भुखाचय् लानाः पीडित जूपिंत नेपालय् च्वनाच्वंपिं मुस्मां समुदायं ग्वाहालि याःगु दु । नेवाः मुस्मां समाजं वंगु माघ २३ गते टर्कीइ वंगु विनाशकारी तःभुखाचय् लानाः विचलित जूपिनिगु निंतिं राहत संकलन यानाः ग्वाहालि याःगु खः ।

समाजं संकलन याःगु राहत सामग्री मस्तय्त नकेगु सेरेलेक्स, मस्तय् निंतिं आवश्यक डाइपर, ब्ल्यांकेट व ज्याकेट संकलन यानाः हाम्रो नेपाल नांया संस्थापाखें टर्कीइ छ्वःगु दु । विगतय् नेपालय् भुखाय् ब्वःगु इलय् नं टर्कीपाखें नेपाःयात आपालं ग्वाहालि याःगु लुमंकाः समाजं उकथं राहत संकलन यानाः उखेपाखे छ्वःगु खः ।

समाजया अध्यक्ष निसार उद्दिनं झीसं टर्कीया भुखाय् लानाः पीडित जुयाच्वंपिंत पूर्ण रुपं ग्वाहालि याये मफुसां अज्याःगु पीडा थःपिंसं नं महसुस यानागु व मानवीय नातां छुं भचा जूसां ग्वाहालि यायेमाः धइगु भावनां शुभचिन्तक, पासाभाई, सहयोगी दातापाखें प्राप्त जूगु राहत छ्वयागु धासें ग्वाहालि यानादीपिं सकसितं आभार प्वंकादीगु दु ।