वंगु छुं न्ह्यवंनिसें स्वनिगःया सतक टिप्पर आतंकपाखें आक्रान्त जुयाच्वंगु दु । लँय् चले याना हइगु टिप्परं क्यलाः न्हिंन्हिं हे धइथें मनू सीगु, घापाः जुइगु घटनात अप्वयेवं आः ट्राफिक प्रहरीं स्वनिगलय् टिप्पर धइगु हे चान्हय् जक चले याये दइगु नियम दयेका बिउगु दु । न्हिनय् अप्वः यानाः टिप्परं ठक्कर नकीगु घटना अप्वःगुलिं टिप्परयात चान्हय् सरे याना छ्वःगु खः ।
तर थुलि यानाच्वनं तक नं टिप्परं क्यलाः मनू घाःपाः जुइगु घटना धाःसा म्हो जूगु मदुनि । टिप्पर दुर्घटना जुया हे च्वंगु दु । थथे जूगुया मू कारण ला लँय् लाथेपाथे ढंगं टिप्पर चले याना हइगुलिं हे खः । स्वनिगःया व्यस्त लँय् नं टिप्पर गाडी थुकथं ब्वाकाः चले याना हइ मानौं उमिसं तिंख्यः दथुइ गाडी ब्वाकाच्वंगु दु । टिप्पर चले याइपिं अधिकांश चालकत ल्याय्म्हचापिं जुयाच्वनी । उपिं मध्ये अप्वःसिके ला लाइसेन्स हे दइ मखु । थन टिप्पर चले यायेगु स्यनेगु व वयां लिपा लाइसेन्स दयेवं विदेश वनेगु उमिगु उद्देश्य खनेदु । उकिं टिप्पर चले याइपिं अप्वः धइथें चालकत शिकारु हे तिनि । उमिसं चले याना हइगु टिप्परं मनूया ज्यान कयाच्वंगु दु ।
मेखे थौंकन्हय् टिप्पर लगायतया सवारी साधनतय्सं मनू क्यल धाःसा घाःपाः जक जूम्ह खःसां अःखतं ब्याक यानाः स्याना हे बीगु घटना नं उतिकं हे अप्वयाच्वंगु दु । सीसा कम क्षतिपूर्ति बिउसा गाः, घाःपाः जूसा अप्वः खर्च जुइ धकाः । थज्याःगु ज्यायात पनेगु न बल्लाःगु कानून दु, न प्रहरी प्रशासनं हे थुकी गम्भीर रुपं ध्यान बिउ । उकिं लँय् लँय् टिप्परय् मि तया बीगु ज्या नं जुयाच्वंगु दु । थ्व आः प्राथमिकताय् तयाः समाधान यायेमाःगु विषय जूगु दु ।
LEAVE YOUR COMMENTS