लिभरपुल त्यात

इंग्लिस प्रिमियर लिग अन्तर्गत सोमवाः जूगु कासाय् लिभरपुलं क्रिस्टल प्यालेसयात बुकूगु दु । क्रिस्टल प्यालेसया घरेलु मैदानय् जूगु कासाय् लिभरपुलं क्रिस्टल प्यालेसयात २–० गोलं बुकूगु खः। लिभरपुलया लागि जेम्स मिलनर व सेडियो मानें छगू छगू गोल याःगु खः । न्हापागुं हाफया ४५ मिनेटय् पेनाल्टीइ जेम्स मिलनरया गोलं लिभरपुल अग्रता काःगु खः।

निगुगू हाफया इन्जुरी इलय् सलाहया पासय् साडियो माने गोल याःगु खः ।मेखे स्पेनय् एथ्लेटिको म्याड्रिडं ला लिगाय् जूगु न्हापांगु कासाय् बराबरी म्हितूगु दु । युइएफए सुपर कपया विजेता एथ्लेटिको म्याड्रिडं भ्यालेनसिया नाप १–१ गोलया बराबरी म्हितुगु खः । अर्जेन्टिनी कासामि एन्जेल कोरियाया गोलया ग्वाहालिं एथ्लेटिकों न्हापां अग्रता काःगु खः ।

निगूगु हाफय् डिएगो गोडिनया गल्तीया फाइदा कासें रोड्रिगों भ्यालेन्सियाया निंतिं कासाया ५६ औं मिनेटय् बराबरी गोल याःगु खः। कासाया ९० औं मिनेटय् भ्यालेन्सियाया डानियल वासं गोल यायेत स्वःसां एथ्लेटिकोया गोलकिपर जान ओब्लाकं उत्कृष्ट बचाउ याःगु खः ।