सन्दीप लामिछानें सीपीएल म्हिते मखनीगु

एजेन्सी- नेपाः राष्ट्रिय क्रिकेट टिमया नांजाःम्ह कासामि सन्दीप लामिछानें क्यारेबियन प्रिमियर लिग (सीपीएल) म्हिते मखनीगु जूगु दु । आः वइगु अगस्ट २८ निसें सेप्टेबर १५ तारिख तक सेन्ट किट्सय् शुरु जुइत्यंगु सीपीएलय् सन्दीप लामिछानें राष्ट्रिय टिमय् व्यस्त जुयाच्वंगुलिं म्हिते मखनीगु जूगु खः । सीपीएलय् सन्दीप लामिछानें ट्रिनबागो नाइट राइडर्स पाखें म्हितेत्यंगु खःसां व हे ईलय् नेपाःया राष्ट्रिय टिम आइसीसी विश्वकप लिग २ या त्रिकोणात्मक सिरिज म्हितेत ओमान वनेमाःगु जूगुलिं सन्दीपं सीपीएल मम्हितेत्यंगु खः ।

नेपालं ओमानय् सेप्टेम्बर १३ निसें २० तारिख तक जुइगु आइसीसी विश्वकप लिग २या त्रिकोणात्मक सिरिजय् ओमान व अमेरिकालिसे म्हिती । त्रिकोणात्मक सिरिजसिबें न्ह्यः नेपालं सेप्टेम्बर ५ व ८ तारिखय् पपुवा न्यूगिनीलिसे निगू एकदिवसीय कासा म्हिती । नेपाःया टिम अगस्टया अन्तिमय् ओमानय् वनेगु ज्याझ्वः दु । क्वारेन्टिनय् च्वने माःगुलिं नेपाः याकनं वनेमाःगु खः ।

सन्दीपं थुगुसी भिसाया समस्या कारणं द हन्ड्रेड क्रिकेट व भाइटालिटी टि–२० ब्लास्ट क्रिकेट नं म्हिते मखंगु खः । त्रिकोणात्मक सिरिज धुंकाः सन्दीपं नेपालय् जुइगु प्यक्वःगु एभरेष्ट प्रिमियर लिग म्हिती ।