पेनाल्टिइ स्पेनयात बुकाः इटली युरो कपया फाइनलय्

येँ – स्पेनयात पेनाल्टि सुटआउटय् ४–२ गोलं बुकसें इटली युरो कप २०२० या फाइनलय् दुहां वंगु दु । छगू गोलं लिउने लाःगु अवस्थाय् स्पेनयात बराबरीइ यंकेत ग्वाहालि याःपिं निम्ह कासामि डानी अल्मो व अल्भारो मोराटां पेनाल्टि मिस यायेवं इटली सन् २०१२ लिपा न्हापांखुसी युरो कपया फाइनलय् दुहां वंगु खः ।

कासाया ८० औं मिनेटय् छगू गोलं लिउने लाःगु अवस्थाय् अल्मोया पासय् मोराटां गोल यासें कासा बराबरीइ हःगु खः । थ्व लिपा निगुलिं टिमं गोल यायेमफयेवं कासा पेनाल्टिइ वन । तर पेनाल्टिइ ओल्मों थ्वाःगु न्हापांगु पेनाल्टि हे पोलं च्वं पिहां वनसा मोराटां थ्वाःगु पेनाल्टियात जियानुलोजी डोनारुमां पनाबिउगु खः ।

बेलायतया वेम्ब्ले रंगशालाय् मंगलवाः चान्हय् जूगु न्हापांगु सेमिफाइनलय् कासाया न्हापांगु हाफय् निगुलिं टिमं गोल मजूगु खःसा कासाया ६० औं मिनेटय् केइसां गोल यासें इटलीयात अग्रता बिउगु खः । तर थ्व अग्रता २० मिनेट जक कायम जुल । स्पेनया निंतिं मोरोटां कासाया ८० औं मिनेटय् बराबरीया गोल यानाबिल ।

थुगुसी युरोय् बांलाःगु प्रदर्शन यायेमफुगुलिं आलोचित मोराटायात सेमिफाइनलय् लाइन अपया झिंछम्ह कासामि दुने तकं दुमथ्याकूगु खः । तर बल यक्व प्रोसेसनय् तयाः नं गोल यायेमफयाच्वंगु अवस्थाय् फरान टोरेसया थासय् मोराटोयात मैदानय् क्वत हःगु खः । मैदानय् वःगु १० मिनेट दुने कासाया ८० औं मिनेटय् गोल यासें मोराटां स्पेनयात बराबरीइ हःगु खः । थ्व लिपा निगुलिं टिमं गोल यायेमफयेवं कासा एक्स्ट्रा इलय् वंगु खःसा एक्स्ट्रा इलय् नं निगुलिं टिमं गोल यायेमफयेवं कासा पेनाल्टिइ वंगु खः ।

पेनाल्टिी इटलीया निंतिं म्यानुअल लुकाटेलीं थ्वाःगु न्हापांगु पेनाल्टि स्पेनया गोलकिपर उनाइ सिमोनं पनाबिउगु खः । तर अल्मो व मोराटाया पेनाल्टि मिस जुइवं स्पेन पराजय फयेमाःगु खः ।