गुंलाया झ्वलय् द्वाल्खाय् गुंला पर्व महोत्सव

येँ- येँय् नं पूर्वपाखे लाःगु ऐतिहासिक नेवाः बस्ती द्वाल्खाय् गुंलाया झ्वलय् लाकाः ‘गुंला पर्व महोत्सव’या ग्वसाः ग्वइगु जूगु दु । नेवाः समुदायया बाहुल्यता दुगु सांस्कृतिक, धार्मिक व ऐतिहासिक नगर द्वाल्खाय् थ्व हे वइगु भदौ ८ गते गुंला पर्व महोत्सव यायेत्यंगु खः । स्वनिगलं तसकं सतिक लाःगु द्वाल्खायात नेवाः सभ्यताया हे छगू पुलांगु बजाःया रुपय् नं कायेगु याः ।

गुंला पर्व महोत्सव मूल समारोह समितिं छगू पत्रकार सम्मेलन यासें बिउगु जानकारीकथं द्वाल्खायात धार्मिक पर्यटकीय रुपय् विकास यायेगु ल्याखं उगु महोत्सव यायेत्यंगु खः । २०७२ साल बैशाख १२ गतेया गोरखा केन्द्रविन्दु जुयाः वःगु तःभुखाचं अतिकं प्रभावित जूगु जिल्लामध्ये द्वाल्खा नं छगू खः ।

महोत्सवया आयोजनां तःभुखाचं ध्वस्त जूगु द्वाल्खा पुनःनिर्माणया निंतिं ग्वाहालि जूवनीगु विश्वास ग्वसाः खलकं याःगु दु ।महोत्सव मूल समारोह येँ सम्पर्क समितिया संयोजक प्रवीण प्रधानं नेपाःया हे दकलय् पुलांगु समुदायकथं कयातःगु नेवाःतय् सांस्कृतिक उद्गमस्थलया रुपय् कयातःगु द्वाल्खायात प्रवद्र्धन यानाः धार्मिक पर्यटकीयस्थलया रुपय् विकास यायेगु ल्याखं महोत्सवया ग्वसाः ग्वयेत्यनागु जानकारी बियादिल ।