ख्वपय् सम्यक न्यायेकल

ख्वप – दँय्दसं घ्यःचाकु संल्हू कुन्हु ख्वपय् तःजिक न्यायेकीगु सम्यक महादान म्हिगः थनया जयकृति महाविहार थथुबहीया भुइख्यलय् न्यायेकल । थ्व पर्वय् थनया प्रशन्नशील महाविहार, चतुब्रम्ह महाविहार, मंगल धर्मदीप महाविहार, जयकृति महाविहार व बौद्ध समकृत विहार समेत यानाः न्यागू थाय्यापिं न्याम्ह दीपंकर बुद्धपिं भुइख्यलय् मुंकाः सम्यक भोजन व दानप्रदान ज्या जुइगु खः ।
थ्व सम्यक सञ्चालन यायेगु लागिं गुगुं इलय् ३६० रोपनी जग्गाया व्यवस्था यानातःगु खःसां थौंकन्हय् २० रोपनी जक ल्यं दनि । आः सम्यक न्यायेकीगु भुइख्यः तकं सरकारं अतिग्रहण यानाः विद्युत प्राधिकरण, टेलिकम, खानेपानी, हुलाक व सरकारी वकिलया ज्याकू पलिस्था यानातःगु खँ धायेगु याः ।