बुद्धकृष्णं खुक्वःखुसी म्ये प्वाः खन (भिडियो)

थिमि – बोडेया म्ये प्वाः खनीगु जात्रा क्वचाःगु दु । थिमिया ४६ दँया बुद्धकृष्ण बाग श्रेष्ठं थुगुसी म्येय् प्वाः खनादीगु खः । आइतवाः न्हिनय् २ बजे पाखे श्रेष्ठया म्ये प्वाः खनेगु ज्या जूगु खः । बोडेया पाँचो गणेद्यः न्ह्यःने च्वंगु फल्चाय् कःमि व नाइकें म्ये प्वाः खनेधुंकाः बाग श्रेष्ठं चन्द्राकार भ्वाय् (महादीप) ज्वनाः देय् चाःहिउगु खः ।

लछि न्ह्यव निसें चिकनय् थुनातःगु १० इञ्चया नतूचां म्ये प्वाः खनाः म्येय् उगु हे नतूचा तयाः देय् चाःहिउगु खः । म्ये प्वाः खंगु स्वयेत पाँचो गणेद्यःयाथाय् तसकं भीड जूगु खः । म्ये प्वाः खने न्ह्यः श्रेष्ठं देय् चाःहिलाः थीथी द्यःयाथाय् द्यःपुज्यानाः मत बियादीगु खः ।

देय् चाःहिले धुंकाः बोडेया महालक्ष्मी द्यःयाथाय् च्वंगु चां म्येय् बुलेगु याइ । न्हापा नं म्ये प्वाः खनेधुंकूम्ह श्रेष्ठं महालक्ष्मी द्यःयाथाय् च्वंगु चाः बुलेधुंकाः म्ये प्वाः गंथाय् मेगु छुं वासः तयेम्वाःगु, अथें लनीगु खँ धयादीगु दु । देय् चाःहिलेधुंकाः महालक्ष्मी द्यःयाथाय् हे थ्यंकाः म्येय् च्वंगु नतूचा लिकयाः अन हे देगलय् तायेगु याइ ।

बाग श्रेष्ठं २०६२ साल निसें स्वदँ तक म्ये प्वाः खनादीगु खः । व धुंकाः ज्या यायेगु झ्वलय् कोरिया थ्यंम्ह श्रेष्ठं वंगु निदँ न्ह्यवनिसें हाकनं म्ये प्वाः खनादीगु खः । थुगुसी वय्कलं खुक्वःखुसी म्ये प्वाः खनादीगु खः ।

सिइथे च्वंक विरामी जूगु इलय् म्ये प्वाः खनेधुंकाः लनावंगुलिं थःत विश्वास दुगु खँ कनादिसें वय्कलं व हे विश्वास व परम्परा म्वाकातयेगु निंतिं थःम्हं निरन्तर म्ये प्वाः खनागु खँ वय्कलं धयादीगु दु ।