थाय्मरुया वास्याःद्यः आः फ्रेमय् बन्द

येँ (नेपालभाषा टाइम्स) – थाय्मरु त्वालय् नांजाःगु वास्याःद्यः आः बन्द फ्रेम दुने कैद जूगु दु । थ्व द्यःयात आः नँयागु फ्रेमय् पारदर्शी प्लास्टिक न्हाय्कं दुने बन्द यानाः तया बिउगु खः । नापं वास्याःद्यः दिनाच्वंगु फःचायात नं आः न्हूकथं दयेकूगु दु ।

थ्व बन्द फ्रेम तया बिउगु कारणं आः द्यःयात पिनें स्वये फइसां द्यःयाथाय् ध्यबा तयाः नकिं धाःसा ताये मफइगु जूगु दु । सुयां वा स्यात धाःसा थ्व द्यःयात ध्यबा तयाः नकिं ताना बिल धाःसा लना वनी धइगु विश्वास दु । आः तक नं वा स्याःपिं मनूत थन वयाः नकिं तायेगु यानाच्वंगु दु । थ्व सिँग्वः चाःतुलाच्वंगु जूगुलिं खय् भासं उकियात बांगमुढा धाइगु व थ्वहे नापं थुगु त्वाः समेत ‘बांगेमुढा’ धकाः तयातःगु दु ।

वंगु छुं ई न्ह्यः निकः तक थ्व द्यः खुया यंकेगु कुतः जूगुलिं सुरक्षाया लागिं अन थ्व फ्रेम तयेगु ज्या जूगु खः । अबलय् द्यः खुइगु कुतः याःम्ह खुँयात स्थानीय मनूतय्सं ज्वनाः प्रहरीयात बुझे याना बिउगु खःसां मानसिक सन्तुलन स्यंम्ह धकाः अथें त्वःता हःगु खः ।