लानिपुखली न्यय्छगू पुखूया लः तइगु

येँ (नेपालभाषा टाइम्स) – लानिपुखुलिइ न्यय्छगू पुखूया लः तयेगु तयारी जुयाच्वंगु खँ पुरातत्वविद् इन्जिनियर राजुमान मानन्धरं ‘नेपालभाषा टाइम्स’ यात कनादीगु दु । वय्कःया कथं स्वनिगःया थीथी कुण्ड लिसें रारा ताल, सिलु, सप्तकोशी, नारायणी, बाराह क्षेत्र निसें नेपाःया प्रसिद्ध तीर्थस्थलया लः हयेगु निंतिं थीथी निकाययात पौं छ्वयेधुनागु जानकारी नं बियादीगु दु ।

तर भारतया थीथी प्रसिद्ध खुसीया लः धाःसा तत्काल हयेगु ज्या मजुइगु खँ नं वय्कलं कनादीगु दु। वय्कःया कथं भारतया थीथी प्रसिद्ध तीर्थस्थल व समुन्द्रया लः हयेगु ज्या लिपा जक जुइफइगु खँ कनादिसें शिलापत्रया कथं गंगासागर नेपालय् नं दुगु व भारतय् नं दुगुलिं जनकपुरय् च्वंगु गंगा सागरया लः धाःसा हयेगु तयारी जुयाच्वंगु दु ।

थ्वहे वइगु कार्तिक १ गते सम्भवत राष्ट्रपति विद्यादेवी भण्डारीपाखे लानिपुखूया उलेज्या यायेगु तयारी जुयाच्वंसां नं ई मिले मजुयाच्वंगुलिं वयां लिपा कार्तिक ६ वा ७ गते पाखे उलेज्या जुइफइगु जानकारी नं वय्कलं बियादीगु दु। लानिपुखू दयेकेगु फुक्कं ज्या क्वचायेधुंकूगु दुसा आः छु छुं सरसफाई व मत तयेगु ज्या जक ल्यँ दनिगु खँ नं वय् कलं कनादीगु दु ।

जुजु प्रताप मल्लं नेपाल संवत ७९० सं दयेकेगु ज्या क्वचायेकूगु लानिपुखू वंगु २०७२ सालया भुखाचं क्षति जूगु खः । भुखाचं क्षति जूगु लानिपुखूयात राणाकालय् बुर्जा शैली पुनर्निर्माण याःगु खःसा आः हाकनं ग्रन्थकुट (शिखर शैलीं) पुनर्निर्माण याःगु खः ।