संसारया अर्बपतित गन च्वनी जुइ ?

विश्वया यक्व अर्बपतित गन च्वनी धयागु खँ सिइके यक्व मनूत उत्सुक जू । थ्व हे उत्सुकता वाःचायेकाः अर्बपतित अप्वः थें गन च्वने ययेकू धयागु छगू अध्ययन जूगु दु । थ्व अध्ययनय् ५० करोड डलर स्वयां अप्वः सम्पत्ति दुपिंत अर्बपतिया धलखय् दुथ्याकातःगु दु । नाइट फ््रयांक एलएलपीं सन् २००९ निसें हे अप्वः थें अर्बपतित गन च्वनीगु धयागु खँ सिइकेगु कुतः यानाच्वंगु दु ।

थ्व एजेन्सीं नकतिनि छगू प्रतिवेदन सार्वजनिक यानाः अर्बपतित गन गन च्वनाच्वंगु खँया जानकारी बिउगु दु । थ्व प्रतिवेदन कथं ५० करोड डलर बराबरया सम्पत्ति दुपिं अप्वः थें धनीत उत्तर अमेरिकी महाद्वीपय् च्वनाच्वंगु दु । अध्ययनय् दुथ्याकूपिं अर्बपतित मध्ये दकलय् अप्वः ३१.८ प्रतिशत अमेरिका व क्यानाडाय् च्वनाच्वंगु दु ।

थ्व धुंकाः एशियाय् २८.१ प्रतिशत व युरोपय् २४.४ प्रतिशत धनीपिं च्वनाच्वंगु दु । ल्यं दुपिं १५ प्रतिशत मध्य एशिया, अस्ट्रेलिया, रुस व राष्ट्र मण्डलया स्वतन्त्त देय्, ल्याटिन अमेरिका व अफ्रिकाय् च्वना वयाच्वंगु दु । थ्व प्रतिवेदन तयार यायेगु निंतिं नाइट फ््रयांकं वेल्थ एक्स नांया छगू अन्तर्राष्ट्रिय डाटा कम्पनीया ग्वाहालि काःगु खः ।

अथेहे प्रतिवेदन तयार यायेत विश्वया न्यासलं मल्याक बैंकय् सर्वेक्षण यानाः जानकारी मुंकूगु खः । थ्व बैंकतय्सं विश्वया अज्याःपिं न्यय्द्वलं मल्याक मनूतय् लिसे कारोवार यानाच्वंगु दु, गुमिगु कूल सम्पत्ति स्वंगू अर्ब डलर स्वयां अप्वः दु ।

थ्व प्रतिवेदन कथं दकलय् अप्वः अर्बपतित झिगू देय् अमेरिका, चीन, जर्मनी, जापान, हंगकंग, क्यानाडा, स्वीट्जरल्यान्ड, फ्रान्स, रुस, सीआइएस देय् व बेलायतय् च्वना वयाच्वंगु दु । दकलय् अप्वः अमेरिकाय् च्वना वयाच्वंगु दुसा थ्व धुंकाः चीनय् दकलय् अप्वm च्वना च्वंगु दु । तर अमेरिका व चीनय् च्वनाच्वंपिं अर्बपतितय् दथुइ ल्याखय् धाःसा तःधंगु अन्तर दु ।

अमेरिकाय् चीनया तुलनाय् १३४० म्ह अप्वः अर्बपति च्वनाच्वंगु दु । अमेरिकाय् अर्बपतितय् ल्याः १८३० म्ह दु । झिंछगूगु थासय् लानाच्वंगु भारतय् नं निसःम्ह अर्बपतित च्वनाच्वंगु दु ।सन् २०१६ व २०१७ या दथुइ दकलय् अप्व अर्बपतितय् ल्याः हंगकंगंय् २३ प्रतिशतं अप्वः दुसा बेलायतय् ४ प्रतिशतं म्हो जूगु दु । अथेहे भारतय् सन् २०१६ व २०१७ या दथुइ १८ प्रतिशत अर्बपति अप्वःगु दु ।

थज्याःपिं अर्बपतितय् छथाय् जक च्वनीपिं धाःसा मखु, विश्वया थीथी थासय् वनाः च्वनेगु यानाच्वनी, अले उमिगु सम्पत्ति नं छगू देशय् जक जुइ मखु, निथाय् स्वथाय् दयाच्वनी ।बैंकतय् पाखें मुंकूगु जानकारी कथं ५० करोड डलर स्वयां अप्वः सम्पत्ति दुपिंके म्होतिं नं स्वथाय् छेँ दु । थुपिं मध्ये औसत प्यखा छेँ दुपिं अर्बपतित दकलय् अप्वः मध्य एशियाय् दु ।

अथेहे दकलय् म्हो निखा छेँ दुपिं अर्बपतित अफ्रिकाय् च्वनेगु यानाच्वंगु दु ।अथेहे अर्बपतितय्के निगू देय्या नागरिकता दइगु नं सामान्य हे खः । थ्व प्रतिवेदन कथं रुसी बैंकय् सेवा कयाच्वंपिं अर्बपतित मध्ये ५८ प्रतिशतयाके निगू देय्या नागरिकता दु ।

अथेहे ४१ प्रतिशत ल्याटिन अमेरिकी व ३९ प्रतिशत मध्य एशियाली अर्बपतितय्के निगू देय्या नगारिक दु । थ्व अध्ययनय् १०० करोड डलरं अप्वः सम्पत्ति दुपिं जक २२०८ म्ह अर्बपतित दुथ्यानाच्वंगु दु ।

सम्बन्धित बुखँ

LEAVE YOUR COMMENTS