शेयर बजाः कुहां वनाः ब्रोकरत नं घाटाय्

येँ – शेयर बजाः कुहां वनाः लगानीकर्ता जक मखु, ब्रोक कम्पनी नं घाटाय् वंगु दु । बजाः कुहां वंगुलिं हे वंगु आर्थिक दँय् जक च्यागू ब्रोकर कम्पनीं द्यापं फयेमाःगु दु । थ्वयां न्ह्यवया दँय् नं न्हय्गू कम्पनीं द्यापं फयेमाःगु खः । थथे हे शेयर बजाः कुहां वनाच्वन धाःसा थ्व दँय् अझ अप्वः कम्पनीं द्यापं फयेमालीगु जुइ धकाः ब्रोकर कम्पनीत चिन्तित जुयाच्वंगु दु ।

ब्रोकर कम्पनीतय्सं भचा भचा जक मखु, करोडौं तकाया द्यापं फयाच्वंगु दु । वंगु आर्थिक दँय् दकलय् अप्वः द्यापं फःगु कम्पनी मिडास स्टक ब्रोकिङ हाउसं जक छगू करोड २५ लाख घाटाय् वंगु खः । अथेहे मेगु कम्पनी मल्ल एन्ड मल्लया घाटा नं छगू करोडं च्वय् थ्यंगु खः ।
ब्रोकर कम्पनीत द्यापनय् लाःगु मू कारण शेयर कारोवार हे म्हो जूगुलिं खः ।

थौंकन्हय् शेयर कारोवार न्हापा स्वयां बछि धयाः थें म्हो जूवनाच्वंगु दु । कारोवार म्हो जुइवं ब्रोकर कम्पनीतय्त वइगु कमिशन नं म्हो जूवंगु दु । उकिसनं थगुने निसें नेपाल धितोपत्र बोर्डं ब्रोकरतय्गु कमिशन नं क्वपला बिउगु दु । गुकिं यानाः द्यापं नं अप्वया वनाच्वंगु खः । थुगुने निसें ब्रोकर कम्पनीतय्त शेयर कारोवारय् न्याइम्ह व मिइम्ह पाखें ०.४० प्रतिशत निसें ०.६० प्रतिशत तक जक कमिशन कायेदइगु व्यवस्था यानाबिउगु खः ।

ब्रोकर कम्पनीतय्सं भचा भचा जक मखु, करोडौं तकाया द्यापं फयाच्वंगु दु । वंगु आर्थिक दँय् दकलय् अप्वः द्यापं फःगु कम्पनी मिडास स्टक ब्रोकिङ हाउसं जक छगू करोड २५ लाख घाटाय् वंगु खः ।

थ्वयां न्ह्यः ब्रोकर कम्पनीतय्सं १ प्रतिशत धयाथें कमिशन कायेगु याना वयाच्वंगु खः ।थांैकन्हय् शेयर कारोवार जुइबलय् ५० हजार तकया कारोवारय् ०.६० प्रतिशत, ५० हजारं च्वय् ५ लाख तकय् ०.५५ प्रतिशत, ५ लाखं च्वय् २० लाख तकया कारोवारय् ०.५० प्रतिशत, २० लाखं च्वय् छगू करोड तक ०.४५ प्रतिशत, एक करोड स्वयां च्वय् कारोवारय् ०.४० प्रतिशत दरं कमिशन कायेदइ ।

थुकी ब्रोकर कम्पनीतय्सं काःगु कमिशनया २० प्रतिशत रकम ब्रोकर कम्पनीं नेप्सेयात बुझे यायेमाःसा धितोपत्र बोर्डं ०.६ प्रतिशत यंकी । थुकी ल्यं दुगु ध्यबाया १५ प्रतिशत अग्रिम कर कथं सरकारयात पुलेमाः । संचालन खर्च, कर व धितोपत्र बोर्ड व नेप्सेयात बीगु यानाः खर्च धाःसा अप्वया च्वंगु तर आम्दानी धाःसा म्हो जुयाच्वंगुलिं ब्रोकर कम्पनीतय्सं द्यापं फयेमालाच्वंगु खँ धाःगु दु ।

आः द्यापं फयेमाःसां लिपा लबः दइगु आसाय् द्यापं फयेमाःसां कम्पनी धाःसा संचालन जुयाच्वंगु दु । शेयर बजाः बांलानाच्वंगु इलय् धाःसा ब्रोकरतय्सं करोडौं तकाया हे नाफा कमे यानाच्वंगु खः । शेयर बजाः कुहां वनाः लगानीकर्तातय्सं नं वंगु निदँया दुने ४ खर्ब १९ अर्ब तका द्यापं फयेधुंकूगु दु । लगानीकर्तात नं खर्बौ तका द्यापं फयेमाःगुलिं सरकार खनाः आक्रोशित जुयाच्वंगु दु ।

वंगु आर्थिक दँय् जक १ खर्ब १३ करोड तका बराबरया २९ करोड ३८ लाख कित्ता शेयर न्यायेमी जूगु खः । थ्व कारोवार दां थ्वयां न्ह्य्वया दँय् स्वयां ४०.७९ प्रतिशतं म्हो खः । थ्वयां न्ह्यवया दँय् २ खर्ब ५ करोड तका बराबरया ३९ करोड २८ लाख कित्ता शेयर न्याये मी जूगु खः ।
शेयर कारोवार म्हो जुयाः सरकारयात वइगु पुँजीगत लाभकर नं म्हो जूवंगु दु ।

सरकारं शेयर कारोवारय् नाफा कमे याःपिं लगानीकर्ता पाखें पुँजीगत लाभकर काइगु खः । आर्थिक दँय् २०७३÷७४ य् छगू अर्ब ४५ करोड पुँजीगत लाभकर उठे याःगु सरकारं थ्वयां लिपांगु दँय् मुक्कं ६१ करोड २ लाख ७४ हजार तका जक लाभकर म्हयेफुगु खः । कारोवार हे म्हो जूगुलिं सरकारं काइगु पुँजीगत लाभकर नं म्हो जूगु खँ नेप्सेया अधिकारीतय्सं धाःगु दु ।