ने. सं. ११४४ कौलाथ्व दशमी - स्याक्वत्याक्व

ज्ञानमाला भजन छेँ दयेकेत २० लाख

येँ- पुरातत्व विभागं स्वयम्भूया ज्ञानमाला भजन यायेगु सतः दनेगु निंतिं २० लाख तका बीगु जूगु दु । वंगु पुस २८ गते बहनी मिं नयाः क्षति जूगु उगु सतःया स्वरुप मस्यनी कथं दयेकेगु निंतिं पुरातत्व विभागं थ्व ध्यबा बीत्यंगु खः । सतः दनेत मगाःगु ध्यबा मेगु दँय् बीगु खँ विभागया महानिर्देशक भेषनारायण दाहालं धयादीगु दु । चालु आर्थिक दँया निगूगु चौमासिक नं क्वचायेत्यंगुलिं विभागं आः हे उगु शीर्षकय् अप्वः ध्यबा बी मफइगु जूगुलिं मगाः ध्यबा आकिवं जक बीत्यंगु खः ।

येँ निर्वाचन क्षेत्र नम्बर ८ पाखें निर्वाचित जुयादीम्ह प्रतिनिधिसभा दुजः जीवनराम श्रेष्ठं गौतम बुद्धया उपदेशयात सांगितिक रुपय् न्ह्यब्वयेगु संस्कृति न्ह्याःगु भजन छेँ याकनं दयेकेगु निंतिं थम्हं फक्व ग्वाहालि यायेगु प्रतिवद्धता प्वंकादीगु दु । अथेहे येँ मनपाया–१५ वडाया वडाध्यक्ष ईश्वरमान डंगोलं स्वयम्भू क्षेत्रय् देश विदेशं नं भक्तजनपिं वइगु ल्याः न्हिथं अप्वया वनाच्वंगु खँ कनादिसें जीर्ण जुयाच्वंगु सम्पदायात याकनं भिंकेमाःगु खँ धयादीगु दु ।

विसं १९९४ स स्वयम्भू महाचैत्यपाखें भिक्षु व उपासकंपिंसं बुद्ध वचनया थीथी आयामयात कःघानाः शिक्षा बीगु आज्जु तयाः ज्ञानमाला भजनया विकास याःगु खः। हिन्दू व बौद्धं धर्मावलम्बीं आस्था तया वयाच्वंगु स्वयम्भुया सम्पदास्थल पुनःनिर्माणया निंतिं सरोकारवालतय्सं बांलाक चिउताः क्यनेगु खःसा खर्चया अभाव मजुइगु खँ स्वयम्भू व्यवस्थापन तथा संरक्षण महासमितिं धाःगु दु ।

अन्तर्राष्ट्रिय क्षेत्रय् नं थीथी दातृ संघसंस्थाया प्रतिनिधिलिसे ग्वाहालिया निंतिं इनाप यानागु खँ महासमितिया महासचिव महेन्द्ररत्न बुद्धाचार्य जानकारी बियादीगु दु । वंगु २०७३ सालया भुखाचं उगु क्षेत्रय् आपालं सम्पदा क्षति जूगु खः । स्वयम्भू चैत्यया गोलाद्र्धया थीथी थासय् चर्के जूगु दुसा त्रयोदश भूवनया चक्का कुतुं वयेत्यंगु दु ।