‘नेपाली भूमिं विदेशी सेना लित यंकेमाः’
प्रधानमन्त्रीं ‘भारतीय सेना’ धायेगु आँट मयात
येँ – प्रधानमन्त्री केपी ओलीं वार्तापाखें भारतलिसे सीमा सम्बन्धी विवाद ज्यंकेगु खँ धयादीगु दु । आइतवाः जूगु नेकपाया भातृ संगठन युवा संघया राष्ट्रिय एकता भेलाय् न्ववानादिसें प्रधानमन्त्री ओलीं नेपाः शान्तिया पक्षय् दुगु व जःलाखःला देय्लिसे तनाव अप्वयेके चाहे मजूगु धासें वार्तापाखें समस्या ज्यंकेगु दावी यानादीगु खः ।
वय्कलं धयादीगु दु, ‘सरकारं संवादया माध्यमं थ्व सीमा सम्बन्धी समस्या समाधान याइ । झीगु भूमिं विदेशी फौजतयात लित छ्वयेगु जुइ, झीगु भूमिया रक्षा यायेगु जुइ ।’ थ्व झ्वलय् वय्कलं नेपाःया भूमिं विदेशी सेनायात लित यंकेत इनाप यासें थ्व सरकारं छगू इञ्ची नं नेपाली भूमि सुयातं मिचे याके बी मखु धयादीगु दु ।
संवोधन यायेगु झ्वलय् विदेशी सेना लित यंकेमाः धाःसां प्रधानमन्त्री ओलीं तप्यंक भारतीय सेना धकाः न्ववायेगु आँट धाःसा यानामदिल ।
भारतया नां तकं मकासे वय्कलं धयादीगु खः, ‘जिमित मेपिनि भूमि नं म्वाः, जिमिगु भूमिं झी जःलाखःलां सेनां लित यंकी । जिमिगु भूमिइ सेना तयादीमते, लित यंकादिसँ, थ्व हे जिमिगु इनाप दु ।’
भारतं कालापानी व लिम्पियाधुराया भूभाग थःपिनिगु देशय् लाकाः भारतीय नक्सा पित वयेवं नेपालय् थुकिया तच्वःगु विरोध जुयाच्वंगु दु ।
प्रधानमन्त्री ओलीं नक्सा जक सचे यानाः मगाः धासें आःया खँ नक्साया जक मखु, भूमि हे लित कायेगु खः धयादिल । वय्कलं धयादीगु दु, ‘थ्व सरकारं भूमि हे लित काइ ।
नक्सा ला प्रेसय् छापे याःसां जिल । नक्सा छापे यायेगु खँ मखु, भूमि हे लित कायेगु खः । नेपालीत भूमि लित कायेत सक्षम दु व सक्षम जुइमाः ।’ प्रधानमन्त्रीं थःगु भाषणय् भूमि हे लित कायेमाः धाःसां भारतया नां तकं काये मफुगु खँय् आलोचना जुयाच्वंगु दु । थ्वयां न्ह्यव नं भारतीय नक्सा पिहां वयेवं प्रधानमन्त्री छुं न्वमवाःगु धकाः आलोचना जुयाच्वंगु खः ।
दूतावास न्ह्यःने प्रदर्शन याःपिंत नियन्त्रण
येँ – भारतं नेपाःया भूभाग थःपिनिगु नक्सा दुथ्याकेगुयात कयाः नेपालय् जुयाच्वंगु विरोधया झ्वलय् म्हिगः नेपाली कांग्रेसया भातृ संगठन नेवि संघं भारतीय दूतावास न्ह्यःने प्रदर्शन याःगु दु । लैनचौरय् च्वंगु दूतावासय् प्रदर्शन जुयाच्वंगु इलय् धाःसा प्रहरीं हस्तक्षेप याःगु दु ।
हाकुगु ब्यानर सहित नेपाली ध्वाँय् ब्वयेकाः प्रदर्शन यानाच्वंपिंत प्रहरीं बलपूर्वक नियन्त्रणय् काःगु खः । प्रदर्शनकारीतय्सं प्रदर्शनया झ्वलय् हाकुगु ब्यानरय् लिम्पियाधुरा दुथ्याःगु नेपाली नक्सा च्वयाः बेलुनय् तयाः ब्वयेकूगु खः । उगु ब्यानरय् ‘मोदी स्व, थ्व खः नेपाःया नक्सा’ धकाः अंग्रेजीं च्वयातःगु खः ।
LEAVE YOUR COMMENTS